பாவப்பட்ட விமானப் பயணிகள்!

நீர்வாகக் காரணங்களுக்காக விமானங்கள் 'ரத்து' என்ற தலைப்புச் செய்தி கடந்த சில நாட்களாகவே நமது செய்தி ஊடகங்களில் அடிக்கடி தென்படத் தொடங்கியுள்ளது.

- எஸ். ஸ்ரீதுரை

இந்த ஆண்டு நவம்பர், டிசம்பர் ஆகிய இரண்டு மாதங்களில் இயக்கப்படவேண்டிய அறுபது வழித்தடங்களுக்குரிய பயணிகள் விமானங்களின் இயக்கத்தை ஏர்இந்தியா நிறுவனம் ரத்து செய்துள்ளது. குறிப்பாக இந்திய, அமெரிக்க நகரங்களுக்கு இடையிலான இயக்கத்தை ரத்து செய்துள்ளது. இது விமானப் பயணத்தையே நம்பிருப்பவர்களுக்குப் பெரும் அதிர்ச்சியை ஏற்படுத்தியிருக்கின்றது.

இவ்வாரம் திங்கட்கிழமை மட்டும் சென்னையிலிருந்து சிங்கப்பூர், பங்களாதேஷ், இலங்கை ஆகிய நாடுகளுக்குச் செல்ல வேண்டிய எட்டு விமானங்கள் திடீரென்று ரத்து செய்யப்பட்டிருக்கின்றன. அந்நாடுகளிலிருந்து சென்னைக்கு வரவேண்டிய இணைவிமானங்கள் ரத்து செய்யப்பட்டிருப்பதால், இங்கிருந்து இயக்கப்படவேண்டிய இவ்விமான சர்வீஸ்களும் ரத்து செய்யப்பட்டிருப்பதாகச் செய்திகள் தெரிவிக்கின்றன. இவ்விமானங்கள் ஏர் இந்தியா, ஸ்ரீலங்கன் ஏர்லைன்ஸ் ஆகிய நிறுவனங்களால் இயக்கப்படுபவையாகும்.

இது மட்டுமா? கடந்த வாரம் சென்னையிலிருந்து திருவனந்தபுரம், பெங்களூர், புவனேஸ்வரம், கொல்கத்தா, சிலிகுரி ஆகிய நகரங்களுக்குச் செல்லும் ஏர் இந்தியா எக்ஸ்பிரஸ் விமானங்களும், அவற்றின் இணை விமானங்களுமாக பத்து விமானங்கள் முன்னறிவிப்பின்றி ரத்து செய்யப்பட்டன.

நமது நாட்டின் தலைநகரமாகிய புது தில்லி சமீப காலமாக கடுமையான காற்று மாசு காரணமாக பாதிக்கப்பட்டுள்ள நிலையில் விமானங்களின் வருகை, புறப்பாடு ஆகியவை தாமதமாவதும், விமானங்கள் வேறு விமான நிலையங்களுக்குத் திருப்பி அனுப்பப்படுவது அல்லது ரத்து செய்யப்படுவதும் ஒரு தொடர் நிகழ்வாகவே ஆகிவிட்டிருக்கின்றது.