அதானி விவகாரத்தால் அமளி; நாடாளுமன்றம் 3-ஆவது நாளாக முடக்கம்

தொழிலதிபர் அதானி மீதான அமெரிக்க நீதித்துறையின் லஞ்ச குற்றச்சாட்டு, உத்தர பிரதேசத்தின் சம்பல் பகுதியில் நடந்த வன்முறை ஆகிய விவகாரங்களை எழுப்பி எதிர்க்கட்சிகள் அமளியில் ஈடுபட்டதால், நாடாளுமன்றத்தின் இரு அவை களும் வியாழக்கிழமை 3-ஆவது நாளாக முடங்கின.

நாடாளுமன்ற குளிர்கால கூட்டத்தொடர் கடந்த திங்கள்கிழமை தொடங்கிய நிலையில், முதல் நாளிலேயே அதானி மீதான லஞ்ச குற்றச்சாட்டு, சம்பல் பகுதியில் மசூதி ஆய்வின் போது நிகழ்ந்த வன்முறை ஆகிய விவகாரங்கள் குறித்து உடனடி விவாதம் கோரி எதிர்க்கட்சிகள் அமளியில் ஈடுபட்டன. இதனால், இரு அவைகளின் அலுவல்களும் முடங்கின.

கடந்த செவ்வாய்க்கிழமை (நவ. 26) அரசமைப்பு தினத்தை யொட்டி, நாடாளுமன்ற சிறப்பு கூட்டு அமர்வு நடைபெற்றதால், அன்றைய தினம் வழக்கமான அலுவல்கள் நடைபெறவில்லை. இரண்டாவது நாளான புதன்கிழமையும் (நவ. 27) எதிர்க்கட்சிகளின் அமளியால், இரு அவைகளும் ஒத்திவைக்கப்பட்டன.

மையப் பகுதியில் முற்றுகை: மூன்றாவது நாளான வியாழக்கிழமை மக்களவை கூடியதும், காங்கிரஸ் பொதுச்செயலர் பிரியங்கா காந்தி (வயநாடு), பாஜகவின் ரவீந்திர வசந்த்ராவ் சவான் (நாந்தேட்) ஆகியோர் எம்.பி.க்களாக பதவி ஏற்றனர். வயநாடு, நாந்தேட் மக்களவைத் தொகுதிகளுக்கு அண்மையில் நடைபெற்ற இடைத்தேர்தலில் முறையே பிரியங்கா காந்தி, ரவீந்திர சவான் ஆகியோர் வெற்றி பெற்றிருந்தனர்.