காஸாவில் இஸ்ரேல் படை நிலைத்திருக்கும்

ஜெருசலேம், நவ. 29: காஸா போர் முடிவுக்கு வந்தாலும், அந்தப் பகுதியில் இஸ்ரேல் படையினர் பல ஆண்டுகளுக்கு நிலைத்திருப்பார்கள் என்று அந்த நாட்டு பாதுகாப்பு கேபினட் உறுப்பினரும், உணவுப் பாதுகாப்புத் துறை அமைச்சருமான ஏவி டிச்டர் தெரிவித்துள்ளார்.

காஸா பகுதியில் இஸ்ரேல் வலுவான ராணுவக் கட்டமைப்புகளை உருவாக்கிவருவதாக வெளியான தகவலை உறுதி செய்து, அவர் இவ்வாறு கூறினார்.

இது குறித்து அவர் வெள்ளிக்கிழமை கூறியதாவது:

காஸாவில் இஸ்ரேல் ராணுவம் பல ஆண்டுகளுக்கு நிலை கொண்டிருக்கும். அங்கு ஹமாஸ் அமைப்பு அழிக்கப்பட்டாலும், புதிதாக அந்த அமைப்பில் சேரக்கூடிய வர்களை எதிர்த்துப் போரிடுவதற்காக ராணுவத்தினர் அங்கு தொடர்ந்து நிறுத்தப்படுவார்கள்.

மேற்குக் கரையைப் போலவே இனி காஸா பகுதிக்கும் இஸ்ரேல் படையினர் எப்போது வேண்டுமானாலும் சென்று வரலாம் என்று நிலை இருக்கும். அல்லது, நெட்ஸரீம் வழித்தடப் பகுதியில் இஸ்ரேல் ராணுவம் ஆண்டுகணக்கில் நிலை கொண்டிருக்கும்.

நாங்கள் புதிதாக ஒரு போரைத் தொடங்கப்போவதில்லை. அதற்காக, போரை ஒரேயடியாக முடித்துவிடவும் முடியாது. காஸா விவகாரத்தில் இன்னும் நிறைய பணிகள் நிலுவையில் உள்ளன என்றார் அவர்.

முன்னதாக, காஸா பகுதியில் இஸ்ரேல் படையினர் நிலையான ராணுவக் கட்டமைப்புகளை உருவாக்கிவருவதாக பணி முடிந்து திரும்பிய ரிசர்வ் படையினர் தெரிவித்தனர். மத்தியதரைக் கடல் எல்லையிலிருந்து இஸ்ரேல் எல்லைவரை காஸாவை இணைத்து, சுமார் 4 கி.மீ. வரையிலான அகலத்தில் 'நெட்ஸரீம்' என்ற வழித்தடத்தை இஸ்ரேல் அமைத்துவருவதாக அவர்கள் கூறினர்.