வெள்ளத்தில் தத்தளிக்கும் ஊத்தங்கரை: அடித்துச் செல்லப்பட்ட வாகனங்கள்!

ஊத்தங்கரை, டிச. 2: கிருஷ்ணகிரி மாவட்டம், ஊத்தங்கரையில் 50 ஆண்டுகளுக்குப் பிறகு வரலாறு காணாத வகையில் ஞாயிற்றுக்கிழமை காலை முதல் பெய்த தொடர் கனமழையால் சாலைகள் துண்டிக்கப்பட்டன. வாகனங்கள் அடித்துச் செல்லப்பட்டன; குடியிருப்புகளுக்குள் நீர் புகுந்ததால் மக்களின் இயல்பு வாழ்க்கை பாதிப்படைந்தது.

வாகனங்கள் மீட்பு: ஊத்தங்கரை, அதன் சுற்றுவட்டாரப் பகுதிகளில் உள்ள அனைத்து ஏரிகளும் நிரம்பின. உபரிநீர் ஊத்தங்கரை அண்ணா நகர், காமராஜர் நகர் குடியிருப்புகளுக்குள் புகுந்தது. திருப்பத்தூர் சாலையில் உள்ள பரசனேரி நிரம்பியதால் அந்த ஏரியிலிருந்து உபரிநீர் காட்டாற்று வெள்ளம்போல வெளியேறி, ஊத்தங்கரை பேருந்து நிலைய பகுதி, வாடகை வாகன நிறுத்தமிடம் உள்ளிட்ட இடங்களில் சூழ்ந்தது. இதனால் அங்கு நிறுத்தப்பட்டிருந்த 40-க்கும் மேற்பட்ட வாகனங்கள் அடித்துச் செல்லப்பட்டன. அனைத்து வாகனங்களையும் பொக்லைன் இயந்திரம் மூலம் கயிறு கட்டி மீட்கும் பணியில் பேரிடர் மீட்புக் குழுவினர் ஈடுபட்டனர்.