3 மாவட்டங்களுக்கு புயல் நிவாரணம் ரூ.2,000

ஃபென்ஜால் புயலால் இரு நாள்களுக்கு மேல் மழை நீர் சூழ்ந்து வாழ்வாதாரம் பாதிக்கப்பட்ட 3 மாவட்டங்களின் குடும்ப அட்டைதாரர்களுக்கு நிவாரணமாக தலா ரூ.2,000 வழங்கப்படும் என முதல்வர் மு.க.ஸ்டாலின் செவ்வாய்க்கிழமை அறிவித்தார்.

ஃபென்ஜால் புயல் காரணமாக விழுப்புரம், கள்ளக்குறிச்சி, கடலூர் மாவட்டங்கள் மிக அதிக பாதிப்புகளைச் சந்தித்துள்ளன. இதே போன்று, திருவண்ணாமலை, தருமபுரி, கிருஷ்ணகிரி ஆகிய மாவட்டங்களின் சில பகுதிகளில் மழையளவு வழக்கத்தைவிட அதிகமாக இருந்தது.

முதல்வர் ஆலோசனை: இந்நிலையில், புயலால் பாதிப்புக்குள்ளான மாவட்டங்களில் நிவாரண உதவிகளை அளிப்பது தொடர்பாக, சென்னை தலைமைச் செயலகத்தில் முதல்வர் மு.க.ஸ்டாலின் செவ்வாய்க்கிழமை ஆலோசனை நடத்தினார்.

இந்தக் கூட்டத்துக்குப் பிறகு தமிழக அரசு சார்பில் வெளியிடப்பட்ட செய்திக் குறிப்பு: புயல் காரணமாக, விழுப்புரம், கள்ளக்குறிச்சி, திருவண்ணாமலை, கடலூர் மாவட்டங்களில் நிவாரணப் பணிகள் மேற்கொள்ளப்பட்டு வருகின்றன. இந்தப் பணிகள் தொடர்பாக துணை முதல்வர் உதயநிதி ஸ்டாலின், அமைச்சர்கள் உள்ளிட்டோரை காணொலி வழியாக முதல்வர் மு.க.ஸ்டாலின் தொடர்புகொண்டு பேசினார். இதைத் தொடர்ந்து, நிவாரண உதவிகள் குறித்து அதிகாரிகளுடன் கலந்துரையாடினார். அதனடிப்படையில் நிவாரண உதவிகள் வழங்கப்படவுள்ளன.