சமத்துவம் பேணிய குருகுலங்கள்

மகாத்மா காந்தியடிகள் இந்த மண்ணின் சுதந்திரத்திற்கு எத்தனை முக்கியத்துவம் தந்தாரோ அதனினும் அதிகமாக சமத்துவ சமுதாயம் மலர வேண்டும் என்பதில் கவனம் செலுத்தினார்.

தனது ஆசிரமத்தில் அதனை செயல்படுத்தியும் காட்டினார். அவரைப் பின்பற்றியவர்கள் ஜாதி மதப் பாகுபாடுகள் பார்க்காமல் சமத்துவத்தைக் கடைப்பிடித்தனர்.

1931-ஆம் ஆண்டு, காந்தியடிகள் லண்டனில் நடைபெற்ற முதல் வட்ட மேஜை மாநாட்டில் கலந்து கொண்டு உரை நிகழ்த்தினார். அதில், அன்றைய பிரிட்டிஷ் அரசு இந்தியாவில் ஏற்படுத்தியிருந்த கல்விமுறை பற்றிப் பேசியிருக்கிறார். பிரிட்டிஷார் ஏற்படுத்தியிருந்த கல்வி முறையை விட ஐம்பது, நூறு ஆண்டுகளுக்கு முன்பாக, இந்தியாவில் கல்வி நிலை சிறப்பாக இருந்தது என்று அவர் குறிப்பிடுகிறார்.

எதிர்காலக் கல்வி பற்றிய அக்கறையும் பார்வையும் காந்தியடிகளிடம் தெளிவாகவே இருந்தது.

“இந்தியாவின் இப்போதைய கல்வி நிலை முந்தைய ஐம்பது அல்லது நூறு வருடங்களுக்கு முந்தைய கல்வி நிலையை விட மிகவும் மோசமாக இருக்கிறது. பர்மாவிலும் இதே நிலைதான். ஏனென்றால் பிரிட்டிஷ் நிர்வாகிகள் இந்தியாவுக்கு வந்தபோது, இங்கு நிலவிய அமைப்புகளைப் புரிந்துகொண்டு அதை வளர்த்தெடுப்பதற்குப் பதிலாக அவற்றை அப்புறப்படுத்தத் தொடங்கினார்கள். மண்ணைத் தோண்டி வேரை எடுத்து ஆராய்ந்தார்கள். அதன் பிறகு அந்த வேரை அப்படியே மட்கி வாடும்படி விட்டுவிட்டார்கள். அந்த அழகிய மரம் அழிந்துவிட்டது” என்று அந்த மாநாட்டில் உரையாற்றியபோது பேசியிருக்கிறார்.

“இந்திய பாரம்பரியப் பள்ளிகளை அவர்கள் ஒரு பள்ளியாகவே மதிக்கவில்லை என்பதால் அவையெல்லாம் அழிந்து விட்டன. அதோடு ஐரோப்பிய பாணி பள்ளிகள் அதிகக் கட்டணம் வசூலிப்பவையாக இருந்ததால் மக்களால் அதன் முழுப் பலனைப் பெற முடியவில்லை. ஒரு நூற்றாண்டுக்கு உள்ளாக, இந்திய மக்கள் அனைவருக்கும் அடிப்படைக்கல்வி என்ற இலக்கை யாராலும் அடைய முடியாது என்றே சொல்கிறேன். எனது பாவப்பட்ட தேசம், அவ்வளவு செலவு அதிகமான ஐரோப்பிய பாணி கல்வியைப் பெறும் நிலையில் இல்லை. எனவே, பிரிட்டிஷ் அரசு இந்திய பாரம்பரியப் பள்ளி ஆசிரியர்களை மீட்டெடுத்து ஒவ்வொரு கிராமத்திலும் ஆண், பெண் குழந்தைகள் இருவருக்குமான பள்ளிகளைத் தொடங்க வழி செய்ய வேண்டும்” என்ற அவரது சொற்கள் அதை உறுதிப்படுத்துகின்றன.