விவசாயிகள் பேரணி: மூன்றாவது முறையாக தடுத்து நிறுத்தம்

தில்லி நோக்கி பேரணியாகச் செல்ல முயன்ற 101 விவசாயிகளை ஹரியாணா காவல் துறை மூன்றாவது முறையாக சனிக்கிழமை தடுத்து நிறுத்தியது.

சண்டீகர், டிச.14:

போலீஸார் வீசிய கண்ணீர்ப் புகைக்குண்டுகள் மற்றும் ரப்பர் குண்டுகள் தாக்கியதில் 18 விவசாயிகள் காயமடைந்தனர்.

ஏற்கெனவே கடந்த டிசம்பர் 6 மற்றும் டிசம்பர் 8 ஆகிய தேதிகளில் தில்லி நோக்கி பேரணியாக விவசாயிகள் செல்ல முயற்சித்தபோது அவர்களை காவல் துறையினர் தடுத்த நிறுத்தினர்.

வேளாண் பயிர்களுக்கு வழங்கப்படும் குறைந்தபட்ச ஆதரவு விலைக்கு (எம்எஸ்பி) சட்ட உத்தரவாதம், விவசாயக் கடன் தள்ளுபடி உள்ளிட்ட பல்வேறு கோரிக்கைகளை வலியுறுத்தி கடந்த பிப்ரவரி 13-ஆம் தேதி முதல் பஞ்சாப்-ஹரியாணா எல்லையில் உள்ள ஷம்பு பகுதியில் விவசாயிகள் போராட்டம் நடத்தி வருகின்றனர்.

இந்நிலையில், தங்களின் கோரிக்கைகளை மத்திய அரசு ஏற்க வேண்டும் எனவும் அரசு சார்பில் பேச்சுவார்த்தை நடத்த முன்வர வேண்டும் எனக் கூறி தில்லி நோக்கி பேரணியை மீண்டும் 101 விவசாயிகள் சனிக்கிழமை தொடங்கினர். அப்போது கண்ணீர்ப் புகைக்குண்டுகளை வீசியும் இரும்புத் தடுப்புகள் அமைத்தும் காவல் துறையினர் அவர்களைத் தடுத்து நிறுத்தினர்.