நூதன இணையவழி கைது

திட்டம் போட்டு நாடகமாடும் மோசடி கும்பல், எப்படி தங்கள் கோர வலையில் சிக்க வைக்கிறார்கள் என்பது ஆச்சரியம்! படித்த குற்றவாளிகள், காவல் நடைமுறை தெரிந்தவர்கள். உளவியல் ரீதியாக மனிதர்களைத் தங்கள் வலைக்குள் சிக்க வைக்கும் முறைகளில் பயிற்சி பெற்றவர்களாக உள்ளார்கள்.

- ஆர்.நடராஜ்

காவல் துறை என்றாலே ஒரு விதமான பயம் தொற்றிக் கொண்டுவிடுகிறது! அதுவும் கைது நடவடிக்கை என்று பயமுறுத்தினால் சப்த நாடியும் ஒடுங்கிவிடும். சட்டத்தை மதிக்கும் சாதாரண மக்களுக்குத்தான் இந்த அச்சம். சமூக விரோதிகளுக்கு இது பொருந்தாது. சட்ட மீறல் அவர்களுக்கு வாடிக்கை. அரசியலில் அடி எடுத்து வைப்பவர்க்கு கைது நடவடிக்கை அரசியல் பாதையில் முக்கியமான மைல்கல், முன்னேற்றத்திற்கு அச்சாரம்!

சாதாரண மக்களுக்கும், நடுத்தர வர்க்கத்தினருக்கும் போலீஸ் விசாரணை என்றாலே மிகப்பெரிய மானபங்கம். பல வருடங்களுக்கு முன்பு மதுரை திலகர் திடல் காவல் நிலையத்திற்கு குடும்ப சச்சரவு சம்பந்தமாக ஓய்வுபெற்ற ஆசிரியர் ஒருவர் விசாரணைக்கு வரவழைக்கப்பட்டார். சில மணிநேரம் விசாரணைக்குத் தாமதமானது. போலீஸ் விசாரணை என்ற அவமானம் தாங்காமல், மதியம் காவல்நிலையத்தில் யாரும் இல்லாதபோது அவர் தூக்கிட்டுத் தன்னுயிரை மாய்த்துக் கொண்டது மிகப்பெரிய சட்டம் ஒழுங்குப் பிரச்னையாக வெடித்தது.

காவல் துறையின் சந்தேகத்திற்கு உட்பட்டாலே சுய கௌரவம், சுய மரியாதை பாழடையும், சமுதாயத்தில் தலைகுனிவு ஏற்படும் என்ற உணர்வு நடுத்தர மக்களிடம் உள்ளது.

மக்களின் இந்த மனநிலையை நன்றாகப் புரிந்து கொண்டு பல மோசடியாளர்கள் அப்பாவி மக்களை ஏமாற்றுவது தினம்தோறும் அதிகரித்து வருகிறது.

மத்திய புலனாய்வுத் துறை, மாநில குற்றப்புலனாய்வுத் துறை மற்றும் மத்திய அமலாக்கத் துறை செய்யும் திடீர் சோதனைகள், கைது நடவடிக்கை, கைப்பற்றப்படும் ரொக்கப் பணம், நகைகள் பற்றிய செய்திகள், காட்சிகள் அடிக்கடி ஊடகங்களில் வருகிறது. ஊழலுக்கு எதிரான இந்த நடவடிக்கைகளை மக்கள் வரவேற்றாலும் மறுபுறம் சட்டங்களை அமலாக்கும் துறைகளைப் பற்றி இனம் தெரியாத பயம் கவ்விக் கொள்கிறது.

வழக்கு என்று வந்துவிட்டால் வருடக்கணக்காகப் போராடித்தான் நிரபராதியாக வெளிவர முடியும், அதுவும் உறுதியில்லை என்பதை நிதர்சனமாக நடைமுறையில் உள்ளதை மக்கள் பார்க்கிறார்கள். அதனால் தான் நேர்மையானவர்களையும் பயம் சூழ்கிறது. இந்த பயத்தை மூலதனமாக வைத்து மோசடிப் பேர்வழிகள் அப்பாவி மக்களை ஏமாற்றிப் பணம் பறிக்கிறார்கள்.