சிறுபான்மையினருக்கு திமுக என்றென்றும் அரண்

சிறுபான்மையினருக்கு திமுக என்றென்றும் அரணாகத் திகழும் என்று முதல்வர் மு.க.ஸ்டாலின் தெரிவித்தார்.

தமிழக அரசின் மாநில சிறுபான்மையினர் ஆணையம் சார்பில் திருச்சி ஜமால் முகமது கல்லூரியில் புதன்கிழமை நடைபெற்ற சிறுபான்மையினர் உரிமைகள் தின விழாவில் காணொலி வழியாகப் பங்கேற்ற முதல்வர் மேலும் பேசியது:

நாடு தற்போது எதிர்கொண்டிருக்கும் சூழல்களைப் பார்க்கையில் சிறுபான்மையினர் நலனில் அக்கறையும், ஜனநாயகத்தின் மீது பற்றும், சகோதரத்துவத்தின் மீது நம்பிக்கையும் கொண்டவர்கள் இதுபோன்ற நிகழ்ச்சிகளை நடத்தி, நல்லிணக்கத்தை ஏற்படுத்த வேண்டியது அவசியமாக உள்ளது. திமுக ஆட்சிக்கு வரும் போதெல்லாம், சிறுபான்மை சமூக மேம்பாட்டுக்கான நலத்திட்டங்களை பாசத்துடன் மேற்கொள்ளும். அதனால்தான் சிறுபான்மையினர் சமூகத்தின் காவலனாக திமுக போற்றப்படுகிறது.