அன்பைக் கொடுத்து அன்பைப் பெறுவோம்!

அவசரமான இன்றைய காலகட்டத்தில் ஒவ்வொருவரும் எதையோ நோக்கி ஓடிக்கொண்டிருக்கிறோம்.

- ந. ராஜசேகரன்

ஆனால், நம்முடைய இலக்குகள் என்றுமே முடிவதில்லை. ஓர் இலக்கை அடைந்தபின் அடுத்த இலக்கு உதயமாகிறது. அதன் பின்பு அதை நோக்கி அடியெடுத்து வைப்பதே நமது அன்றாட நடவடிக்கையாகி விடுகிறது.

நாம் அனைவரும் வெற்றி பெற்றுவிட்டது போலவும், சாதித்து விட்டதைப் போலவும் உணர்கிறோம். ஒவ்வொரு செயலிலும் நம்முடைய பதிவுகள் பாராட்டுப் பெறும்போது, நம்மையும் அறியாமல் நம்முடைய ஆதிக்கம் எல்லா செயல்களிலும் இருக்க வேண்டும் என்று எதிர்பார்க்கிறோம். ஆனால், உளவியல் ரீதியாக நம்மையும் அறியாமல் நம்முடைய உறவுகளிடமும், நண்பர்களிடமும், உடன் பணிபுரிபவர்களிடமும், நம்மை சார்ந்தோரிடத்திலும் நமது ஆதிக்கம் மேலோங்குகிறது.

சில சூழ்நிலைகளில் நாம் நினைத்த செயல் நடைபெறாமல் போகலாம். எல்லா நேரங்களும் நாம் நினைப்பதுபோல இருக்காது என்பதுதான் உண்மை. இதுபோன்ற நிலைகளில் நம்மிடம் சரியான புரிதல்கள் இல்லாததால், நம்முடைய உறவுகளையும், நண்பர்களையும் நாம் இழக்கவும் துணிகிறோம் என்பதுதான் வேதனையான விஷயம்.

இதுபோன்ற ஒரு சூழல் கணவன்-மனைவிக்கிடையே வரலாம், நண்பர்களுக்கிடையே வரலாம், மேலதிகாரிகளுக்கும் பணியாளர்களுக்குமிடையே வரலாம், பெற்றோர்களுக்கும் பிள்ளைகளுக்கும்கூட வரலாம்.

இப்படிப்பட்ட நேரத்தில் பலவீனமான மனநிலையிலிருந்து விடுபட்டு, நம்மைச் சார்ந்தவர்களின் சிறப்பம்சங்களையும், தகுதியையும் நினைத்துப் பார்க்க வேண்டும். அப்படிப்பட்ட நபர்கள், நம்மிடம் எவ்வாறு நடந்து கொள்கிறார்கள் என்பதையும், நம்மை எவ்வாறு நடத்துகிறார்கள் என்பதையும் உணர வேண்டும்.