பாஜக-காங்கிரஸ் எம்.பி.க்கள் தள்ளுமுள்ளு

அம்பேத்கர் அவமதிப்பு விவகாரம் தொடர்பாக நாடாளுமன்ற வளாக நுழைவு வாயில் பகுதியில் வியாழக்கிழமை காலை ஆர்ப்பாட்டத்தில் ஈடுபட்டிருந்த பாஜக எம்.பி.க்களுக்கும், காங்கிரஸ் எம்.பி.க்களுக்கும் இடையே தள்ளுமுள்ளு ஏற்பட்டது.

பாஜக எம்.பி.க்கள் தள்ளியதில் மாநிலங்களவை எதிர்க்கட்சித் தலைவரும் காங்கிரஸ் தேசியத் தலைவருமான 82 வயது மல்லிகார்ஜுன கார்கே நிலைதடுமாறி தரையில் அமர்ந்ததாகத் தெரிகிறது.

காங்கிரஸ் எம்.பி.க்கள் தள்ளியதில் பாஜக எம்.பி.க்கள் பிரதாப் சந்திர சாரங்கி, முகேஷ் ராஜ்புத் ஆகியோர் காயமடைந்ததாகக் கூறப்படுகிறது.

இந்தக் கைகலப்பு தொடர்பாக எதிர்க்கட்சித் தலைவர் ராகுல் காந்தி மீது பாஜக எம்.பி.க்கள் தரப்பிலும், மல்லிகார்ஜுன கார்கேயை தாக்கியதாக பாஜக எம்.பி.க்கள் மீது காங்கிரஸ் தரப்பிலும் காவல் நிலையத்தில் புகார் அளிக்கப்பட்டது.

மாநிலங்களவையில் கடந்த செவ்வாய்க்கிழமை நடைபெற்ற அரசியல் சட்ட விவாதத்தின் மீது மத்திய உள்துறை அமைச்சர் அமித் ஷா உரையாற்றியபோது, காங்கிரஸ் கட்சித் தலைவர்கள் அம்பேத்கர் பெயரையும், அரசியல் சாசனம் குறித்தும் தொடர்ச்சியாகப் பேசி வருவதை விமர்சித்தார். 'அம்பேத்கர் பெயரை தொடர்ந்து பலமுறை முழக்கமிடுவது வாடிக்கையாகிவிட்டது. அதற்குப் பதிலாக கடவுளின் பெயரை இவ்வளவு முறை உச்சரித்தால், சொர்க்கத்தில் அவர்களுக்கு இடம்கிடைத்திருக்கும்' என்று குறிப்பிட்டார்.