குழந்தைகள் உலகம் மீளட்டும்!

அது அமெரிக்காவின் கடைவீதி. ஒரு கடைகளுக்குள்ளும் நுழைகிறார். தாம் தேடும் பொருள் கிடைக்காத மனநிலையோடு அடுத்தடுத்த கடைகளுக்கும் செல்கிறார்.

- என்.மாதவன்

அவரை எதிர்ப்படும் ஒருவர், என்ன பொருளை அவர் தேடுகிறார் என வினவுகிறார். 'குழந்தைகள் பயன்படுத்தும் டவல், மேஜை, நாற்காலி போன்ற பொருள்கள் கிடைக்குமா என்று தேடுகிறேன். அது எங்கும் கிடைப்பதாயில்லை' என்று வருத்தத்துடன் பகிர்கிறார்.

பின்னர் கடையில் கிடைக்காவிட்டால் என்ன தாமே தயாரித்து அறிமுகம் செய்வோம் என தமது முயற்சியைத் தொடங்குகிறார். அவர், நியூயார்க் நகரின் கொலம்பியா பல்கலைக்கழகப் பேராசிரியரும் குழந்தை மையக் கல்வியாளருமான ஜான் டூயீ.

இன்றைக்கு நிலைமை மிகவும் மாறியுள்ளது. பெரிய உணவகங்களுக்குச் சென்றால் அங்கு சிறுவர்களுக்காக கைகளைக் கழுவும் இடம் உயரம் குறைவாகத் தனியாக அமைக்கப்பட்டுள்ளது. பெரிய பெரிய நூலகங்களில் சிறார்களுக்கென்று தனிப் பகுதிகள் அமைக்கப்படுகின்றன. பூங்காக்களில்கூட சிறார்கள் விளையாடுவதற்கான விளையாட்டுப் பொருள் கள் நிறுவப்பட்டுள்ளன. இவை எல்லாம் ஆரோக்கியமான மாற்றங்கள்.

கடைகள் எங்கும் குழந்தைகளுக்கான பலவிதமான விளையாட்டுப் பொருள்கள் வெகுவாக கிடைக்கின்றன. மரம், பிளாஸ்டிக் போன்றவற்றால் ஆனதாகவே இவை உள்ளன. பொதுவாக ஓரளவு உறுதித்தன்மை மிக்கதானதாக இவை இருப்பதால் பெரும்பாலும் விரும்பி வாங்கப்படுகின்றன. குறிப்பிட்ட வயது வரை மட்டுமே இப்படிப்பட்ட பொருள்களை கையாண்டு குழந்தைகள் விளையாடுவார்கள். அதன் பின்னர் அவர்களுக்கு அலுப்புத் தட்டிவிடும்.