கழிவுநீர் கலப்பு, குப்பைகளால் மாசடைந்து வரும் புழல் ஏரி

ஆவடி, அம்பத்தூர் பகுதிகளில் உள்ள வீடுகளில் இருந்து வெளியேறி கலக்கும் கழிவுநீரால் புழல் ஏரி தொடர்ந்து மாசடைந்து வருகிறது.

- த.மணிமாறன்

நீர்வள ஆதாரத் துறை அதிகாரிகள் நடவடிக்கை எடுக்க வேண்டும் என பொதுமக்கள் வலியுறுத்தினர்.

சென்னைக்கு குடிநீர் வழங்கும் ஏரிகளில் புழல் ஏரி முக்கிய பங்கு வகிக்கிறது. இதன் மொத்த கொள்ளளவு 3,300 மில்லியன் கனஅடி. 20.86 சதுர மைல் பரப்பளவு கொண்டது. இந்த ஏரியை நீர்வள ஆதாரத் துறை பாராமரித்து வருகிறது.

புழல் ஏரியின் கரை செங்குன்றம், புழல், சூரப்பட்டு, சண்முகபுரம், முருகாம்பேடு, கள்ளிக்குப்பம், பானுநகர், வெங்கடேஸ்வரா நகர் விரிவு, திருமுல்லைவாயல், அரிக்கம்பேடு, பொத்தூர் வரை நீண்டுள்ளது.

புழல் ஏரி தண்ணீர் புழல், கீழ்ப்பாக்கம் சுத்திகரிப்பு நிலையங்களில் சுத்திகரிக்கப்படுகிறது. பின்னர், அங்கிருந்து லாரிகள் மற்றும் குழாய்கள் மூலம் சென்னை மாநகர மக்களுக்கு விநியோகம் செய்யப்படுகிறது.