மகா கும்பமேளா: அமித் ஷாவுக்கு யோகி ஆதித்யநாத் நேரில் அழைப்பு

உத்தர பிரதேசத்தின் பிரயாக்ராஜில் நடைபெறும் மகா கும்பமேளா நிகழ்ச்சியில் பங்கேற்க மத்திய உள்துறை அமைச்சர் அமித் ஷாவுக்கு அந்த மாநில முதல்வர் யோகி ஆதித்யநாத் சனிக்கிழமை நேரில் அழைப்பு விடுத்தார்.

புது தில்லி, டிச. 28:

தில்லியில் நடைபெற்ற இந்த சந்திப்பின்போது உத்தர பிரதேச மாநில அரசியல் நிலவரம் உள்ளிட்ட பல்வேறு விவகாரங்களை இரு தலைவர்களும் விவாதித்தாக தெரிகிறது.

முன்னாள் குடியரசுத் தலைவர் ராம்நாத் கோவிந்த், பாஜக தேசிய தலைவரும், மத்திய அமைச்சருமான ஜெ.பி. நட்டா, மிஸோரம் ஆளுநர் வி.கே.சிங் உள்ளிட்டோரையும் நேரில் சந்தித்து யோகி ஆதித்யநாத் அழைப்பு விடுத்தார்.

உலகின் மிகப்பெரிய ஆன்மிக நிகழ்வுகளில் ஒன்றான மகா கும்பமேளா 12 ஆண்டுகளுக்கு ஒருமுறை நடைபெறுகிறது.

திரிவேணி சங்கமம் அமைந்துள்ள உத்தர பிரதேச மாநிலம், பிரயாக்ராஜ் நகரில் வரும் ஜனவரி 13-ஆம் தேதிமுதல் பிப்ரவரி 26-ஆம் தேதி வரை மகா கும்பமேளா நடைபெற உள்ளது.

உலகெங்கிலும் இருந்து சுமார் 45 கோடி பக்தர்கள் இந்நிகழ்வில் பங்கேற்பர் என்று எதிர்பார்க்கப்படுகிறது.