வசீகரப் புன்னகை விடை பெற்றது!

1977-இல் அமெரிக்காவில் அதிபர் தேர்தல் மும்முரமாக நடைபெற்றுக் கொண்டிருந்தது. நாட்டு மக்கள் தொலைக்காட்சியைப் பார்த்துக் கொண்டிருந்தபோது, பளிச்சென்று சிரித்தபடி ஒருவர் தோன்றுகிறார்.

- மொழிபெயர்ப்பு: ஊடகவியலாளர்.

"நான் ஜார்ஜியாவைச் சேர்ந்தவன். வேர்க்கடலை வியாபாரம் செய்கிறேன். ஜனநாயகக் கட்சியின் வேட்பாளராக அதிபர் தேர்தலில் போட்டியிடுகிறேன்" என்கிறார். அவர்தான் ஜேம்ஸ் எர்ல் கார்ட்டர் ஜூனியர். சுருக்கமாக ஜிம்மி கார்ட்டர். தனது 100-ஆவது வயதைக் கடந்து அக்டோபரில் பிறந்த நாளைக் கொண்டாடி விட்டு, ஞாயிற்றுக்கிழமை (டிச. 29, 2024) உலகிலிருந்து விடை பெற்றார்.

தேர்தல் பரப்புரையின்போது, "என் பெயர் ஜிம்மி கார்ட்டர். அதிபர் தேர்தலில் களத்தில் நிற்கிறேன்" என்றே பேசினார். வெற்றி பெற்று, பதவிப் பிரமாணம் எடுத்துக் கொண்டபோதும், "நான், ஜிம்மி கார்ட்டர்" என்றே கூறினார். தன்னை எல்லோரும் ஜிம்மி என்று அழைக்கும் வகையிலேயே அதிகாரபூர்வமாக அழைக்க வழி செய்து கொண்டார்.

இதற்கு ஒரு காரணமும் உண்டு. ஜார்ஜியா மாகாணத் தேர்தலின்போதே அவரை "யார் இந்த ஜிம்மி" என குடியரசுக் கட்சியினர் கேலியாகக் குறிப்பிட்டார்களாம்.

அமெரிக்க அரசியல் வரலாற்றில் ஜான் பிட் ஸ்ஜெரால்ட் கென்னடி சுட்டுக் கொல்லப்பட்ட பிறகு, ரிச்சர்டு நிக்சன், ஜெரால்டு ஃபோர்டு என குடியரசு கட்சியைச் சேர்ந்தவர்களே அதிபர்களாகினர். கென்னடிக்குப் பிறகு ஜனநாயகக் கட்சியைச் சேர்ந்த அதிபர் யாரும் வரவில்லையே என்ற பலரது ஏக்கத்தைக் களைவதற்காகவே வந்தவர் போல இருந்தார்.

எழுபதுகளின் தொடக்கத்தில் ஜார்ஜியா ஆளுநர் பதவியில் ஜிம்மி கார்ட்டர் இருந்தார். பதவி நிறைவின்போது, "நான் நாட்டின் அதிபர் ஆவேன்" என்றார். இரண்டே ஆண்டுகளில் அதை எண்ணியாங்கு எய்தினார். இத்தனைக்கும் ஜார்ஜியா ஆளுநராக தன் விருப்பத்தை வெளி யிட்டபோது, அமெரிக்க நாடு முழுவதும் அவரை அறிந்தோர் 5 சதவீதத்துக்கும் குறைவே.

அவருக்கு முன் அதிபர்களாக இருந்த குடியரசுக் கட்சியினர் மக்களுக்கே அலுப்பு ஏற்படச் செய்ததாக விமர்சனம் உண்டு. தேர்தல் களம் சூடுபிடித்த போது, வேர்க்கடலை வியாபாரி கார்ட்டர் 37 மாகாணங்களில் சூறாவளிச் சுற்றுப் பயணம் மேற்கொண்டார். நூற்றுக் கும் மேற்பட்ட கூட்டங்களில் லட்சக்க ணக்கான மக்களைச் சந்தித்தார். விளைவு, அவரது சிரிப்பு எல்லோருக்கும் பிடித்துப் போயிற்று.

ஞாயிற்றுக்கிழமையன்று கடைசி மூச்சுவிடும் வரைக்கும் ஏதாவது ஒரு பணி என்று இயங்கிக் கொண்டே இருந்தார்.