தமிழகத்தின் கனவுகளை மதித்தவர் மன்மோகன் சிங் - முதல்வர் மு.க.ஸ்டாலின் புகழாரம்

தமிழகத்தின் கனவுகளை மதித்தவர் முன்னாள் பிரதமர் மன்மோகன் சிங்; மத்தியில் அவரது தலைமையிலான ஆட்சியில் தமிழகத்துக்கு ஏராளமான வளர்ச்சித் திட்டங்கள் செயல்படுத்தப்பட்டன என்று முதல்வர் மு.க.ஸ்டாலின் தெரிவித்தார்.

மறைந்த முன்னாள் பிரதமர் மன்மோகன் சிங், காங்கிரஸ் முன்னாள் தலைவர் ஈ.வி.கே.எஸ். இளங்கோவன் ஆகியோரின் படத்திறப்பு நிகழ்ச்சி தமிழ்நாடு காங்கிரஸ்சார்பில் தேனாம்பேட்டையில் உள்ள காமராஜர் அரங்கில் செவ்வாய்க்கிழமை நடைபெற்றது. முதல்வர் மு.க.ஸ்டாலின் பங்கேற்று, படங்களைத் திறந்து வைத்து மலர் தூவி அஞ்சலி செலுத்தினார்.

நிகழ்ச்சியில் முதல்வர் பேசியதாவது: காங்கிரஸ் கட்சிக்கு அகில இந்திய அளவில் மாபெரும் தூணாக மன்மோகன் சிங்கும், தமிழகத்தில் ஈ.வி.கே.எஸ். இளங்கோவனும் விளங்கினர். இரண்டு முக்கியமான தலைவர்களை அடுத்தடுத்து இழந்திருக்கிறோம். இருவருடைய மறைவும் பெரிய இழப்பாகும்.

உலகமேதை: மன்மோகன்சிங் இந்திய அளவில் மட்டுமல்லாமல், உலகப் பொருளாதார மேதைகளில் ஒருவராக மதிக்கப்பட்டவர். எதிர்பாராதவிதமாக அரசியலில் நுழைந்து நிதியமைச்சராக பொறுப்பேற்றார். அதுவும், மிக நெருக்கடியான நேரத்தில், அந்தப் பொறுப்பை ஏற்று நாட்டின் நிதியமைச்சராக சரித்திரத்தில் இடம்பெற்றார். அவர் உருவாக்கிக்கொடுத்த பொருளாதாரத் திட்டங்கள்தான் இந்தியாவின் வளர்ச்சிக்கு அடித்தளமாக அமைந்தன.