டாஸ்மாக் நிறுவனத்தில் ரூ.1,000 கோடி முறைகேடு: அமலாக்கத் துறை

தமிழக அரசின் டாஸ்மாக் நிறுவனத்தில் ரூ.1,000 கோடி முறைகேடு நடைபெற்றிருப்பதாக அமலாக்கத் துறை தெரிவித்துள்ளது.

சென்னை, மார்ச் 13:

தமிழகத்தில் உள்ள 4,829 டாஸ்மாக் மதுபானக் கடைகள் மூலம் தினமும் சுமார் ரூ.100 கோடிக்கு மது விற்கப்படுகிறது. தற்போது தமிழக மின்சாரம் மற்றும் மதுவிலக்கு ஆயத்தீர்வைத் துறை அமைச்சராக வி. செந்தில் பாலாஜி உள்ளார். டாஸ்மாக் மதுபானக் கடைகளில் பெருமளவு முறைகேடு நடைபெறுவதாக தமிழகத்தைச் சேர்ந்த சில அரசியல் கட்சிகள் குற்றம்சாட்டின.

இந்தப் புகார்களிலும், குற்றச்சாட்டுகளிலும் இருந்த தகவல்களின் அடிப்படையில் அமலாக்கத் துறையினர் அண்மையில் விசாரணையைத் தொடங்கினர். அதேபோல டாஸ்மாக் அதிகாரிகள் மீது கடந்த 2016-ஆம் ஆண்டு முதல் ஊழல் தடுப்புத் துறையினர் பதிவு செய்த சுமார் 35 வழக்குகளையும் அமலாக்கத் துறையினர் தங்களது விசாரணைக்கு எடுத்துக் கொண்டனர்.

அமலாக்கத் துறை சோதனை: இந்நிலையில், அமலாக்கத் துறையினர் தமிழகம் முழுவதும் சுமார் 25 இடங்களில் கடந்த வாரம் 3 நாட்கள் சோதனையில் ஈடுபட்டனர். சென்னை எழும்பூர் தாளமுத்து நடராசன் மாளிகையில் உள்ள டாஸ்மாக் தலைமை அலுவலகம், தியாகராயநகர் திலக் சாலையில் உள்ள திமுக எம்.பி. ஜெகத்ரட்சகனுக்கு சொந்தமான அக்கார்டு மதுபான நிறுவனம், ஆயிரம்விளக்கு கிரீம்ஸ் சாலையில் உள்ள எஸ்என்ஜெ மதுபான நிறுவனம், அம்பத்தூரில் உள்ள டாஸ்மாக் கிடங்கு உள்ளிட்ட 7 இடங்கள் மற்றும் விழுப்புரம், புதுக்கோட்டை, தஞ்சாவூர், கோயம்புத்தூர் ஆகிய இடங்களில் உள்ள தனியார் மதுபான ஆலைகள், நிறுவனங்கள், கரூரில் உள்ள அமைச்சர் செந்தில் பாலாஜியுடன் தொடர்புடையவர்களின் வீடு ஆகியவற்றில் சோதனை நடைபெற்றது.