திருவாரூர் கோயில் பங்குனி உத்திரத் திருவிழா: நெல் கோட்டைகளுடன் வந்த பூதகணங்கள்

திருவாரூர் தியாகராஜர் கோயிலில் பங்குனி உத்திரத் திருவிழா கொடியேற்றம் சனிக்கிழமை நடைபெறுவதையொட்டி, குண்டையூர் கிழார் அனுப்பிய நெல் கோட்டைகள் வெள்ளிக்கிழமை இரவு பரவை நாச்சியார் மாளிகை வந்தடைந்தன.

திருவாரூர்/திருக்குவளை, மார்ச் 14:

திருவாரூர் தியாகராஜர் கோயிலில் பங்குனி உத்திரத் திருவிழா ஆண்டுதோறும் சிறப்பாக நடைபெறுவது வழக்கம். பங்குனி உத்திர திருவிழாவின் நிறைவாக ஆழித்தேரோட்டம் நடைபெறும்.

இவ்விழாவை சுந்தரர், திருநாவுக்கரசர் ஆகியோர் நடத்தியதாகவும், அவ்வாறு ஒருமுறை திருவிழாவுக்கு வரும் சிவனடியார்களுக்கும், பக்தர்களுக்கும் உணவளிக்க சுந்தரர் உதவிகேட்டு வேண்ட, இறைவன் திருக்குவளையை அடுத்த குண்டையூர் கிழாரிடம் இருந்து நெல்லை பெற்று, பூதகணங்களைக் கொண்டு திருவாரூரில் உள்ள சுந்தரர், பரவை நாச்சியார் மாளிகையில் சேர்த்ததாக ஐதீகம்.