ரூ.23 கோடியில் மின்சார பஸ் வாங்கப்படும் முதலமைச்சர் ரங்கசாமி தகவல்

தட்டாஞ்சாவடியில் ரூ.528 கோடியில் தலைமை செயலகம், மற்றும் சட்டசபை வளாகம் கட்டப்பட உள்ளதாக முதலமைச்சர் ரங்கசாமி தெரிவித்தார்.

நாட்டின் 77வது சுதந்திர தின விழா, அரசு சார்பில் புதுச்சேரி கடற்கரை சாலை காந்தி சிலை அருகே நேற்று கொண்டாடப்பட்டது. காலை 8.55 மணிக்கு முதலமைச்சர் ரங்கசாமி கடற்கரைச் சாலை வந்தார். அவரை தலைமை செயலர் காலனி ராஜீவ் வர்மா, டி.ஜி.பி., ஸ்ரீனிவாஸ் வரவேற்றனர். விழா மேடைக்கு சென்ற முதல்வர் ரங்கசாமி தேசியக்கொடி ஏற்றி வைத்து மரியாதை செலுத்தினார். நடந்து சென்று போலீசாரின் அணிவகுப்பு மரியாதை ஏற்றுக்கொண்டு சுதந்திர தின விழா உரையாற்றினார். முதலமைச்சர் ரங்கசாமி பேசும்போது கூறியதாவது, ஆதிக்கத்திலிருந்து விடுதலை பெற உடல், பொருள், ஆவி என அனைத்தையும் தியாகம் செய்த சுதந்திரப் போராட்ட வீரர்களையும், அவர்களின் வீர சாகசங்களையும் நினைவுகூர்வது நமது முதல் கடமையாக இருக்க வேண்டும். அவர்களின் தியாகத்திற்கு தலைவணங்கி, மரியாதை செலுத்த இது உகந்த தருணம். தியாக செம்மல்களுக்கு என் நன்றி கலந்த வீரவணக்கம் செலுத்துவதில் பெருமிதம் கொள்கிறேன். நம்நாடு சுதந்திரம் பெற்ற நூற்றாண்டை நிறைவு செய்யும் 2047ல் முற்றிலும் முன்னேறிய நாடாக இருக்கும். அதற்கு மாநிலங்களின் பங்களிப்பாக புதுவையின் பங்கு மகத்தானதாக இருக்கும்.