സുന്ദരം, സുരഭിലം

64 പല്ലുകളും വലിയ ചെവിയും നീളൻ നഖവും വെച്ചുപിടിപ്പിച്ച്, ദേഹം കറുപ്പിച്ച്, മുറുക്കിച്ചുവപ്പിച്ച് നാല് മണിക്കൂർ നീണ്ട മേക്കപ്പിലൂടെയാണ് സുരഭി ലക്ഷ്മി കുമാരിയിലെ മുത്തമ്മയായത്. കരിയറിലെ ഏറ്റവും വ്യത്യസ്തമായ വേഷം അവിസ്മരണീയമാക്കാൻ നടത്തിയ തയാറെടുപ്പുകളെക്കുറിച്ച് മലയാളികളുടെ പ്രിയപ്പെട്ട പാത്തു...

“അവളെത്തി കഴിഞ്ഞു. പന്തീരാണ്ട് തലമുറകളായി നാങ്ക കാത്തിരിക്കിഞ്ചോ -അന്ധവിശ്വാസങ്ങളുടെയും ദുരാചാരങ്ങളുടെയും പുകമറ നീക്കി പുറത്തുവരാൻ മടിക്കുന്ന ഇല്ലിക്കൽ ഗ്രാമത്തിലേക്കുള്ള കുമാരിയുടെ വരവ് വിളിച്ചറിയിക്കുന്നത് മുത്തമ്മയാണ്. ഇല്ലിമല ചാത്തന്റെ ഉപാസക. “ഈ കാട് കടന്താലൊരു പുഴ കാണാം. നാൻ പുഴടക്കരെ കാത്തുനിക്കേ നാൻ നിന്നെ ചെകുത്താനരികിലേക്ക് കൊണ്ടുപോകേ" എന്നുപറഞ്ഞ് കുമാരിയെ ചാത്തനരികിലേക്ക് ക്ഷണിക്കുന്നതും മുത്തമ്മ തന്നെ. നിഗൂഢതകൾ നിറഞ്ഞൊരു മുത്തശ്ശിക്കഥക്ക് മനോഹര ഫ്രെയിമുകളിലൂടെ ദൃശ്യ ഭാഷയൊരുക്കിയ 'കുമാരി' എന്ന സിനിമയിൽ ഇടക്കിടെ വന്നുപോകുന്ന മുത്തമ്മയെ അവിസ്മരണീയമാക്കിയത് സുരഭി ലക്ഷ്മിയാണ്. ദേശീയ അവാർഡ് നേടിക്കൊടുത്ത ‘മിന്നാമിനുങ്ങി'ലെ അമ്മ വേഷത്തിനും കേരള ഫിലിം ക്രിട്ടിക്സ് അവാർഡ് ലഭിച്ച 'ജ്വാലാമുഖി'യിലെ ഏയ്ഞ്ചലിനും ശേഷം സുരഭിയുടെ കരിയറിൽ വഴിത്തിരിവാകുകയാണ് കുമാരി'യിലെ മുത്തമ്മ. “വല്ലപ്പോഴും ലഭിക്കുന്നതാണ് മുത്തമ്മയെപ്പോലുള്ള വേഷം. സംസാരത്തിലും അഭിനയത്തിലും മേക്കപ്പിലുമൊക്കെ പാളിപ്പോകാൻ സാധ്യതയുള്ള വേഷമായിരുന്നു. സർക്കസ്സിൽ കയറിലുടെ ബാലൻസ് ചെയ്ത് നടക്കുന്നതുപോലുള്ള വെല്ലുവിളിയാണ് മുത്തമ്മ തന്നത്. ഒന്നങ്ങോട്ടോ ഒന്നിങ്ങോട്ടോ മാറിയാൽ ഒന്നുകിൽ നാടകമായിപ്പോകും അല്ലെങ്കിൽ ഓവറാകും. ഒരേ പോയന്റിലൂടെ സഞ്ചരിച്ചാലേ ശരിയാകൂ. ആ പോയന്റ് കണ്ടെത്താൻ കഴിഞ്ഞതാണ് മുത്തമ്മയുടെ വിജയത്തിന് കാരണം. നാടകക്കളരികൾ, മേക്കപ്, കോസ്റ്റും തുടങ്ങി നിരവധി ഘടകങ്ങൾ അതിന് സഹായിക്കുകയും ചെയ്തു. അഭിനന്ദനങ്ങൾ ഏറെ വാങ്ങിത്തന്ന മുത്തമ്മയുടെ വിശേഷങ്ങൾ സുരഭി പങ്കുവെക്കുന്നു.