വ്യവസായ സ്മാർട്ട് സിറ്റികൾക്ക് മന്ത്രിസഭ സമിതി അംഗീകാരം പാലക്കാട് സ്മാർട്ടാകും

കേന്ദ്രത്തിന്റെ 12 ലോകോത്തര ഗ്രീൻഫീൽഡ് വ്യവസായ സ്മാർട്ട് സിറ്റികളിൽ ഒന്ന് പാലക്കാട്ട് 1710 ഏക്കർ ഭൂമി; 3806 കോടി രൂപ ചെലവ്; 8729 കോടി നിക്ഷേപം; 51,000 തൊഴിലവസരങ്ങൾ

- ഹസനുൽ ബന്ന

ന്യൂഡൽഹി: പാലക്കാട് അടക്കം രാജ്യത്ത് പുതിയ 12 ഗ്രീൻഫീൽഡ് വ്യവസായ സ്മാർട്ട് സിറ്റികൾക്ക് പ്രധാനമന്ത്രിയുടെ അധ്യക്ഷതയിൽ ചേർന്ന സാമ്പത്തിക കാര്യങ്ങൾക്കുള്ള മന്ത്രിസഭ സമിതി അംഗീകാരം നൽകി. പാലക്കാട് നഗരത്തിൽനിന്ന് 20 കിലോമീറ്റർ അകലെയുള്ള 1710 ഏക്കർ ഭൂമിയിൽ 3806 കോടി രൂപ ചെലവിൽ ഒരുക്കുന്ന സ്മാർട്ട് സിറ്റിയിൽ 8729 കോടിയുടെ നിക്ഷേപവും 51,000 തൊഴിലവസരങ്ങളുമാണ് പ്രതീക്ഷിക്കുന്നതെന്ന് കേന്ദ്ര വാർത്ത വിതരണ പ്രക്ഷേപണ വകുപ്പ് മന്ത്രി അശ്വിനി വൈഷ്ണവ് വാർത്ത സമ്മേളനത്തിൽ പറഞ്ഞു. ദേശീയ വ്യവസായിക ഇടനാഴി വികസ ന പരിപാടിയുടെ (എൻ.ഐ.ഡി.സി.പി) ഭാഗമായാണ് ഗ്രീൻഫീൽഡ് വ്യവസായ സ്മാർട്ട് സിറ്റികൾ സ്ഥാപിക്കുക.