മൂന്ന് രാജ്യങ്ങളിൽ ആക്രമണവുമായി ഇസ്രായേൽ

കരയുദ്ധത്തിന് സജ്ജ മെന്ന് ഹിസ്ബുല്ല

ബെയ്റൂത്. ഒറ്റനാളിൽ മൂന്ന് രാജ്യങ്ങളിൽ വ്യോമാക്രമണവുമായി പശ്ചിമേഷ്യയിൽ ഇസ്രായേലിന്റെ തീക്കളി. ഗസ്സക്ക് പുറമെ ലബനാനിലും യെമനിലും വ്യാപക ബോംബിങ്ങാണ് തിങ്കളാഴ്ച പുലർച്ച ഇസ്രായേൽ നടത്തിയത്. മൂന്നിടത്തും നിരവധി പേർ കൊല്ലപ്പെട്ടു. ലബനാനിൽ ഹിസ്ബുല്ല കേന്ദ്രങ്ങൾക്കൊപ്പം ജനവാസ മേഖലകളിലേക്കും ആക്രമണം വ്യാപിപ്പിച്ചപ്പോൾ യെമനിൽ വൈദ്യുതി നിലയങ്ങൾ, തുറമുഖം എന്നിവക്ക് നേരെയായിരുന്നു ബോംബുവർഷം. ഗസ്സയിൽ നിരവധി കേന്ദ്രങ്ങളിലെ ആക്രമണങ്ങളിൽ മാധ്യമ പ്രവർത്തക വഫ ഉദൈനിയടക്കം 12 പേരുടെ മരണം സ്ഥിരീകരിച്ചു.