அதிகபட்சம் 120 கி.மீ. வேகத்தில் சூறைக்காற்று வீசும்: வங்கக் கடல் புயல் இன்று நள்ளிரவில் கரையை கடக்கிறது!

மேற்கு வங்கம், ஒடிசாவில் 10 லட்சம் பேர் அகற்றம்; 200 ரெயில்கள், விமானங்கள் ரத்து!!

வங்கக் கடலில் உருவாகி உக்கிரம் அடைந்து வரும் டானா புயல் இன்று நள்ளிரவுக்கும் நாளை அதிகாலைக்கும் இடைப்பட்ட வேளையில் ஒடிசா உள்ள பிதர்கனிகாவுக்கும், தம்ராவுக்கும் இடையே கரையைக் கடக்கும் என்றும், புயல் அதிகபட்சம் 120 கி.மீ. வேகத்தில் வீசும் என்றும் வானிலை மையம் அறிவித்துள்ளது.

முன்னெச்சரிக்கை நடவடிக்கையாக ஒடிசாவில் 10 லட்சம் பேரும், மேற்கு வங்கத்தில் 3 லட்சம் பேரும் வாழ்விடங்களில் இருந்து அப்புறப்படுத்தப்பட்டு பாதுகாப்பான இடங்களில் தங்க வைக்கப்பட்டுள்ளனர்.

சுமார் 200 ரெயில்கள் ரத்து செய்யப்பட்டுள்ளன. விமான போக்குவரத்தும் நிறுத்தப்படுகிறது.

வங்கக்கடலில் உருவான ஆழ்ந்த காற்றழுத்தம் டானா புயலாக உக்கிரமடைந்துள்ளது. இது இன்று காலை, தம்ராவில் இருந்து தெற்கு மற்றும் தென்கிழக்கே 450 கி.மீ. தொலைவில் மையம் கொண்டிருந்தது.

இந்த டானா புயல் மேலும் வலுவடைந்து, ஒடிசாவில் உள்ள பிதர்கனிகாவுக்கும், தம்ராவுக்கும் இடையே இன்று நள்ளிரவுக்கும் நாளை அதிகாலைக்கும் இடைப்பட்ட வேளையில் கரையை கடக்கும் என வானிலை ஆய்வு மையம் தெரிவித்துள்ளது.