காற்றழுத்த தாழ்வுப்பகுதி நெருங்கியது: கடலோர மாவட்டங்களில் கனமழைக்கு வாய்ப்பு!

வானிலை ஆய்வு மையம் எச்சரிக்கை!!

வங்கக்கடலில் உருவாகியுள்ள காற்றழுத்தத் தாழ்வுப்பகுதி கரையை நெருங்கி வந்து கொண்டிருக்கிறது. இதனால் வடகடலோர மாவட்டங்களில் கனமழை பெய்யும் என வானிலை ஆய்வுமையம் எச்சரித்துள்ளது.

தமிழ்நாட்டில் வடகிழக்கு பருவமழை அக்டோபர் 16-ஆம் தேதி தொடங்கியது. அதற்கு 2 நாட்களுக்கு முன்னதாக சென்னையில் கனமழை கொட்டியது. ஆனால், பருவமழை தொடங்கிய பின்னர் எதிர்பார்த்த அளவு மழை பெய்யவில்லை.

பெரும்பாலும் டெல்டா மாவட்டங்களில்தான் கூடுதலாக மழை பெய்தது. இதை தவிர மேற்குத்தொடர்ச்சி மலையை ஒட்டிய மாவட்டங்களிலும் ஓரளவு மழை பெய்தது. மேலும், மதுரை, ராமநாதபுரம், கன்னியாகுமரி மாவட்டங்களிலும் ஓரிரு நாட்கள் கனமழை பெய்தது.

மற்றபடி பெரிய அளவில் மழை பெய்யவில்லை. இந்தநிலையில், வங்கக்கடலில் 2 வாரங்களுக்கு முன்னர் உருவான புயலின் காரணமாக வட மாவட்டங்களில் மிக மிக கனமழை பெய்தது.

சென்னையை பொறுத்தவரை புயல் கரையை தொடுவதற்கு 2 நாட்களுக்கு முன்னதாக மட்டும் பலத்த மழை பெய்தது. மற்றபடி கடலூர், விழுப்புரம், திருவண்ணாமலை, கள்ளக்குறிச்சி, தருமபுரி, கிருஷ்ணகிரி ஆகிய மாவட்டங்களில் தான் மழை கொட்டியது. அதனால் அங்கு வரலாறு காணாத வெள்ளப்பெருக்கு ஏற்பட்டது.