இரு அவைகளும் முடங்கின: பாராளுமன்ற வளாகத்தில் ராகுல் தலைமையில் எதிர்க்கட்சிகள் போராட்டம்!

“அம்பேத்கரை அவமதித்த அமித்ஷா பதவி விலக வேண்டும்,” என வலியுறுத்தல்!!

அரசியல் சாசன சிற்பி டாக்டர் அம்பேத்கரை அவமதித்த அமித்ஷா மன்னிப்பு கேட்க வேண்டும். அமைச்சர் பதவியை ராஜினாமா செய்ய வேண்டும் என்று வற்புறுத்தி மக்களவை எதிர்க்கட்சித் தலைவர் ராகுல்காந்தி தலைமையில் காங்கிரஸ், திமுக உள்ளிட்ட பல்வேறு கட்சிகளைச் சேர்ந்த எம்.பி.க்கள் நாடாளுமன்ற வளாகத்தில் போராட்டம் நடத்தினர். மக்களவையிலும் மாநிலங்களவையிலும் இதை வலியுறுத்தி கோஷம் எழுப்பினார்கள்.

அமளி மேலோங்கியதை அடுத்து நாடாளுமன்றத்தின் இரு அவைகளும் ஒத்திவைக்கப்பட்டன.

நாடாளுமன்ற குளிர்கால கூட்டத் தொடர் கடந்த மாதம் 25-ஆம் தேதி தொடங்கியது. இன்று 18ஆவது அமர்வாகும். நாடாளுமன்றம் இயல்பாக இயங்கிய நேரத்தை விட அமளியை எதிர்கொண்ட நேரமே அதிகம்.

கடந்த மாதம் 26-ஆம் தேதி நாடாளுமன்ற பழைய கட்டடத்தில் அரசியல் சாசன ஏற்பு 75-ஆவது ஆண்டு கொண்டாடப்பட்டது. இதில் ஜனாதிபதி திரவுபதி முர்மு சிறப்புரையாற்றினார். 2 அவைகளின் உறுப்பினர்களும் விழாவில் பங்கேற்றனர்.

அரசியல் சாசனம் குறித்து மக்களவையில் இம்மாதம் 13-ஆம் தேதியும், 14-ஆம் தேதியும் விவாதம் நடை பெற்றது. பிரதமர் நரேந்திர மோடி விவாதத்துக்கு பதிலளித்து நிறை வுரையாற்றினார். மாநிலங்களவையில் இம்மாதம் 16-ஆம் தேதியும், 17-ஆம் தேதியும் விவாதம் நடைபெற்றது.

உள்துறை மந்திரி அமித்ஷா விவாதத்துக்கு பதிலளித்து நிறைவுரையாற்றினார்.

விவாதம் நடைபெற்ற 4 நாட்களும் நாடாளுமன்றத்தில் சலசலப்புக்கு பஞ்சம் இல்லை.

அமித்ஷா தனது நிறைவுரையில், 'அம்பேத்கர்... அம்பேத்கர்... அம்பேத்கர்...' என முழக்கமிடுவது இப்போது பேஷன் ஆகிவிட்டது. காங்கிரஸ்காரர்களும் இவ்வாறு முழக்கமிட்டுவருகின்றனர்.