മലയാളികളുടെ ഗൾഫ് കുടിയേറ്റം കുറയുന്നുവെന്ന് കണക്കുകൾ

അര നൂറ്റാണ്ടിന്റെ ചരിത്രമുള്ള ഗൾഫ് കുടിയേറ്റം കഴിഞ്ഞ രണ്ട് പതിറ്റാണ്ടുകളായി കുറഞ്ഞു കൊണ്ടിരിക്കുകയാണ്

കൊച്ചി: മലയാളിയുടെ ഗൾഫ് കുടിയേറ്റത്തിൽ വലിയ കുറവു വരുന്നതായി കുടിയേറ്റ സർവേ റിപ്പോർട്ട്. അര നൂറ്റാണ്ടിന്റെ ചരിത്രമുള്ള ഗൾഫ് കുടിയേറ്റം കഴിഞ്ഞ രണ്ട് പതിറ്റാണ്ടുകളായി കുറഞ്ഞു കൊണ്ടിരിക്കുകയാണ്.

2023ലെ സർവേയുടെ അടിസ്ഥാനത്തിലുള്ള പുതിയ കണക്കുകൾ പ്രകാരവും ഗൾഫ് കുടിയേറ്റത്തിന്റെ ട്രെൻഡ് താഴേക്ക് തന്നെയാണ്. ഇപ്പോൾ, മലയാളികൾ കൂടുതലായി പോകുന്നത് ബ്രിട്ടനിലേക്കും യൂറോപ്പിലേക്കും.

ഇന്റർനാഷണൽ ഇൻസ്റ്റിറ്റ്യൂട്ട് ഓഫ് മൈഗ്രെഷൻ ആന്റ് ഡവലപ്മെന്റിന്റെ ഏറ്റവും പുതിയ സർവേ റിപ്പോർട്ട് മലയാളികളുടെ വിദേശ കുടിയേറ്റത്തിന്റെ മാറുന്ന ചിത്രമാണ് പുറത്തു കൊണ്ടുവരുന്നത്.

കഴിഞ്ഞ അഞ്ചു വർഷത്തിനിടെ വിദേശ കുടിയേറ്റത്തിലുണ്ടായ മാറ്റങ്ങളാണ് പഠനത്തിൽ പറയുന്നത്. ബ്രിട്ടൻ, യൂറോപ്പ് തുടങ്ങിയ ഗൾഫ് ഇതര മേഖലകളിലേക്കുള്ള കുടിയേറ്റം കഴിഞ്ഞ അഞ്ചു വർഷത്തിനിടെ ഒമ്പത് ശതമാനം വർധിച്ചു.