എയർടെലിന് പിന്നാലെ ജിയോയും മസ്കിന്റെ സ്റ്റാർ ലിങ്കുമായി കൈകോർത്തു

എവിടെ ജീവിക്കുന്നവരായാലും ഓരോ ഇന്ത്യക്കാരനും താങ്ങാവുന്ന നിരക്കിൽ അതിവേഗ ബ്രോഡ്ബാൻഡ് ലഭ്യമാക്കുകയാണ് ജിയോയുടെ മുഖ്യ അജണ്ടയെന്ന് റിലയൻസ് ജിയോ ഗ്രൂപ്പ് സിഇഒ മാത്യു ഉമ്മൻ പറഞ്ഞു

മുംബൈ: രാജ്യത്ത് സ്റ്റാർലിങ്കിന്റെ ഉപ ഗ്രഹ ഇന്റർനെറ്റ് സേവനങ്ങൾ നടപ്പാക്കാൻ എയർടെലിന് പിന്നാലെ മുകേഷ് അംബാനിയുടെ ജിയോയും കരാറിൽ ഒപ്പുവെച്ചു. ഇലോൺ മസ്കിന്റെ സ്പെയ്സ് എക്സമായി കരാർ ഒപ്പുവെച്ചതായി ഭാരതി എയർ ടെൽ ചൊവ്വാഴ്ചയാണ് പ്രഖ്യാപിച്ചത്. തൊട്ടു പിന്നാലെയാണ് ജിയോയുടെയും പ്രഖ്യാപനം.

ജിയോ തങ്ങളുടെ റീട്ടെയിൽ ഔട്ട്ലറ്റുകൾ വഴിയും ഓൺലൈൻ സ്റ്റോർ വഴിയും സ്റ്റാർലിങ്ക് സൊല്യൂഷനുകൾ ലഭ്യമാക്കും. അതേസമയം, സ്റ്റാർലിങ്ക് സേവനങ്ങൾ ഇന്ത്യയിൽ വിൽക്കുന്നതിന് സ്പെയ്സ് എക്സിന് ഒട്ടേറെ കടമ്പകൾ കടക്കാനുണ്ട്. വിവിധ നിയന്ത്രണ ഏജൻസികളുടെ അനുമതി ലഭ്യമായിട്ടില്ല. ഈ അനുമതികൾ ലഭിച്ചാലെ എയർടെല്ലിന്റെയും ജിയോയുടെയും കരാർ പ്രാബല്യത്തിൽ വരികയുള്ളൂ.