ભાવ આસમાને પહોંચતાં ચામાંથી આદુ થયું ગાયબ: ગૃહિણીઓ પરેશાન

પહેલી વખત આદું આટલું મોંઘું થયું, આદુંની આવકમાં ૭૦ ટકા ઘટાડો ભાવવધારા માટે કારણભૂત

અમદાવાદ, શુક્રવાર 

શહેરમાં છેલ્લા એક મહિના દરમિયાન આદુંના ભાવ મોસમના મિજાજની જેમ રંગ બદલી રહ્યા છે. એક સમયે રૂ. ૧૦૦થી ૧૨૦નું પ્રતિ કિલો મળતું આદું અત્યારે રૂ. ૩૦૦એ કિલો વેચાતાં ગૃહિણીઓ પરેશાન છે. એક જ મહિનામાં આદુંનો એક કિલોનો ભાવ ૧૨૦ રૂપિયાથી વધીને ૩૦૦ રૂપિયાએ પહોંચી ગયો છે. સામાન્ય રીતે ઉનાળામાં શાકભાજીની આવક ઘટે છે, જેથી ભાવ આસમાને પહોંચી જાય છે. ખાસ કરીને લીંબુ, ટામેટાં સહિતના ભાવમાં વધારો થાય છે. પરંતુ આ વર્ષે આદુંના ભાવમાં મોટો ઉછાળો આવ્યો છે. તેની સામાન્ય લોકોને પણ નવાઈ લાગી રહી છે. ચાના સ્વાદરસિયા પણ પરેશાન છે. કેમ કે ભાવ આસમાને પહોંચી જતા ચાની ચૂસકીમાંથી પણ આદું હાલમાં ગાયબ થઈ ગયું છે. વરસાદની સિઝનમાં પણ આદું વગરની ચા પીવાની ફરજ પડી રહી છે.