આઈકોનિક અટલબ્રિજ: ફીમાં વધારા બાદ પણ લોકોમાં આકર્ષણ યથાવત

અત્યાર સુધીમાં ૪૩.૮૫ લાખથી વધુ લોકો લટાર મારી ચૂક્યા છે

શહેરમાં આકર્ષણનાં નવાં કેન્દ્રોમાં કરોડો રૂપિયાના ખર્ચે ડેવલપ કરાયેલા કાંકરિયા લેકફ્રન્ટ ઉપરાંત સાબરમતી રિવરફ્રન્ટ પર નદીના બંને છેડાને જોડતો આઇકોનિક ફૂટ ઓવરબ્રિજ એટલે કે અટલબ્રિજ નો સમાવેશ થાય છે. બહારગામથી આવનારા લોકો અચૂકપણે આ બંને સ્થળોની મુલાકાત લેતા આવ્યા છે. ખાસ તો અટલબ્રિજની વાત કરીએ તો તેની પ્રવેશ ફીમાં વધારો કરાયો હોવા છતાં પણ આનંદ આપનારી બાબત એ છે કે અટલબ્રિજે પોતાનું આકર્ષણ લોકોમાં જાળવી રાખ્યું છે.

આશરે રૂ.૭૪ કરોડના ખર્ચે બનાવાયેલો અટલબ્રિજ એક પ્રકારે મ્યુનિ. તંત્ર માટે આવકની ષ્ટિએ કમાઉ દીકરો પુરવાર થયો છે. ખાસ કરીને વેકેશનના પિરિયડમાં બહુ મોટી સંખ્યામાં લોકો અટલબ્રિજનો લહાવો લેતા આવ્યા છે. ગયા ઉનાળુ વેકેશનમાં પણ અટલબ્રિજ અને તેની સાથેના ફ્લાવરપાર્કની આશરે ૪.૨૬ લાખથી વધુ સહેલાણીઓએ મુલાકાત લેતાં તંત્રને રૂ. ૧.૩૨ કરોડની માતબર રકમની આવક થઈ હતી. તા. ૩૧ ઓગસ્ટ, ૨૦૨૨થી અટલબ્રિજ લોકો માટે ખુલ્લો મુકાયો છે.