"இந்த சவால்கள் நகத்தின் நுனியில் உள்ள தூசிகள்"

பதிவு செய்யப்படாத காரைப பயன்படுத்திய குற்றச்சாட்டில் வெலிக்கடை சிறையில் அடைக்கப்பட்டுள்ள முன்னாள் பாராளுமன்ற உறுப்பினர் ஜோன்ஸ்டன் பெர்னாண்டோ எழுதியதாக இணையத்தளம் ஒன்றில் வெளியாகியுள்ள கடிதம் போலியான கடிதம் என சிறைச்சாலை ஆணையாளர் (ஊடகப் பேச்சாளர்) காமினி பி.திசாநாயக்க தெரிவித்தார்.

சிறைச்சாலையில் உள்ள முன்னாள் பாராளுமன்ற உறுப்பினர் ஜோன்ஸ்டன் பெர்னாண்டோ கடிதம் ஒன்றை வெளியிட்டுள்ளார் எனவும், சந்தேகநபர் அல்லது சிறைச்சாலையிலுள்ள கைதிகள் ஏதேனும் கடிதத்தை வெளியில் அனுப்பினால் அதனை அந்தந்த சிறைச்சாலை அத்தியட்சகரின் பூரண கண்காணிப்பின் கீழ் அனுப்பி வைக்க வேண்டும் எனவும் அவர் தெரிவித்துள்ளார்.

சிறைச்சாலை விதிகள் மற்றும் விதிமுறைகளுக்கு உட்பட்டு சிறைச்சாலைகள் ஆணையானர் நாயகத்தின் அனுமதியுடன் இந்த கடிதம் வெளியானது குறித்து தமக்கு எதுவும் தெரியாது என ஜோன்ஸ்டன் பெர்னாண்டோ எழுத்து மூலம் சிறைச்சாலை அத்தியட்சகருக்கு அறிவித்துள்ளதாகவும் ஊடகப் பேச்சாளர் மேலும் தெரிவித்தார்.

இந்நிலையில், விளக்கமறியலில் வைக்கப்பட்டுள்ள முன்னாள் பாராளுமன்ற உறுப்பினர் ஜோன்ஸ்டன் பெர்னாண்டோ, வெலிக்கடை சிறைச்சாலையிலிருந்து குருநாகல் பிரதேசத்தில் தளது கட்சியின் உறுப்பினர்கள் மற்றும் ஆதரவாளர்களுக்கு எழுதியதாகக்கூறபடும் கடிதமொன்று சமூக வலைத்தளங்களில் தரவேற்றப்பட்டுள்ளது.