இது பட்டங்களின் கதை..!

சினிமா, அரசியல் பிரபலங்களுக்குக் கொடுக்கப்பட்ட பட்டங்கள், பின்னணியில் உள்ள சுவாரசிய சங்கதிகளின் தொகுப்பு இது.

- சதீஷ் பார்த்திபன்

நடிகர் எம்.ஆர். ராதா நாடகக்குழு தஞ்சாவூரில் முகாமிட்டிருந்தது. புதிய நாடகம் நடத்த முடிவு செய்த ராதா, மு.கருணாநிதியைச் சந்தித்து விஷயத்தைச் சொல்ல, ‘தூக்குமேடை’ நாடகத்தை எழுதிக்கொடுத்தார் கருணாநிதி. இந்த நாடக விளம்பரங்களில் தான் வில்லங்கம் வந்தது.

பெரியாரிடமிருந்து பிரிந்து சென்ற அறிஞர் அண்ணா மீது ராதாவுக்கு தீராத கோபம். அதனால் அண்ணாவுக்கு உரிய பட்டத்தைத் தூக்கி ‘அறிஞர்’ கருணாநிதி எழுதிய ‘தூக்குமேடை’ நாடகம் என விளம்பரம் செய்யப்பட்டது.

கருணாநிதிக்கு இது தெரியவர, “அறிஞர் என்றால் அது அண்ணாவை மட்டுமே குறிக்கும். நாடகத்தை நடத்தாதீர்கள்` என ராதாவுக்கு தகவல் அனுப்பினார். நோட்டீஸ் திரும்பப் பெறப்பட்டதால் நாடகம் அரங்கேறியது. நாடக இடைவேளையில் பட்டுக்கோட்டை அழகிரி மூலம் ‘கலைஞர்` எனும் பட்டத்தை கருணாநிதிக்கு வழங்கச் செய்தார் எம்.ஆர்.ராதா.

‘உறந்தை உலகப்பன்’ எனும் நாடகக் கலைஞர்தான் 5.4.1952 அன்று தனது ‘அரும்பு’ நாடக அரங்கேற்றத்திற்கு வந்திருந்த எம்.ஜி.ஆருக்கு, அதே விழாவுக்கு வந்த கலைஞர் கருணாநிதி மூலம் ‘புரட்சி நடிகர்` என்கிற பட்டத்தை வழங்கச் செய்தார்.

எம்.ஜி.ஆர். தனது படங்களில் மக்களுக்கு நல்ல விஷயங்களைப் போதிப்பதை வழக்கமாகக் கொண்டதால் திருநெல்வேலி ரசிகர்கள் அவரை ‘வாத்தியார்` என அழைக்கத் தொடங்கினர். அதையே சென்னையின் பூர்வகுடி மக்கள் ‘வாத்யார்’ என்று அழைத்து மகிழ்ந்தனர்.

‘மக்கள் திலகம்’ என்கிற பட்டத்தை ‘பேசும்படம்’ பத்திரிகை வாசகர் ஒருவர் எம்.ஜி.ஆருக்கு அந்தப் பத்திரிகை மூலமே வழங்கினார். ஒரு நிகழ்ச்சியில் ஆன்மிகப் பெரியவர் கிருபானந்த வாரியார் ‘பொன்மனச் செம்மல்’ என்கிற பட்டத்தை எம்.ஜி.ஆருக்கு வழங்கினார்.