குறைகடத்தி உற்பத்தித் துறையில் சாதிக்க விரும்பும் லாவண்யா

தொழில்நுட்ப ஆற்றலில் சுழலும் இன்றைய நவீன உலகுக்கு அதிகம் தேவைப்படும் குறைக்கடத்தி உற்பத்தித் (semiconductor manufacturing) துறையில் 27 வயது சி.லாவண்யா தமக்கென ஓர் இடத்தை அமைத்துக்கொண்டுள்ளார்.

- யோகிதா அன்புச்செழியன்

கடந்த 2020ஆம் ஆண்டு சிங்கப்பூர் தேசிய பல்கலைக்கழகத்தில் வேதியியல் பொறியியலில் இளங்கலைப் பொறியியல் பட்டம் பெற்ற லாவண்யா, 'குளோபல் ஃபவுண்டரிஸ்' (Global Foundries) நிறுவனத்தில் உற்பத்தித் துறையில் கடந்த நான்கு ஆண்டுகளாக மூத்த 'லித்தோகிராஃபி' செயல்முறைப் பொறியாளராக (senior lithography process engineer) பணியாற்றி வருகிறார்.

"உயர்நிலைப் பள்ளியில் எலுமிச்சம்பழங்களைப் பயன்படுத்தி மின்விளக்கை எரிய வைக்கும் படம் ஒன்று எங்களது வேதியியல் பாடப் புத்தக அட்டையில் இருக்கும். அது என்னை மிகவும் கவர்ந்ததால், நானும் அதை ஆராய்ச்சி செய்து பார்க்க ஆசைப்பட்டேன்," என்றார் லாவண்யா.

இந்த ஆராய்ச்சியே பொறியியல் துறையைத் தேர்ந்தெடுத்துப் படிக்கவும் அத்துறையில் பணிபுரியவும் முக்கிய அடித்தளமாக அமைந்தது என்றார் அவர்.