రేపురాత్రి పిఎస్ఎల్వి- సి60 ప్రయోగం

నేడు షార్కు రానున్న ఇస్రో చైర్మన్ సోమనాథ్

శ్రీహరికోట మొదటి ప్రయోగ వేదికపై నింగికి ఎగిరేందుకు సిద్ధంగా పిఎస్ఎల్వి-సి60 రాకెట్

శ్రీహరికోట (తడ), డిసెంబరు 28 ప్రభాతవార్త: అంతరిక్షంలో ఉపగ్రహాలు వేరువేరు చోట్ల ప్రవేశించినా అవి ఒకదానికొకటి అనుసంధానం అయ్యే సరికొత్త ప్రయోగానికి ఇస్రో సిద్ధమ యింది. ఈ స్పేడెక్స్ ఉపగ్రహాల ప్రయోగం మన తెలుగు నేల శ్రీహరికోట నుంచి సోమవారం రాత్రి 9.58 గంటలకు జరగనుంది.ఉపగ్రహాలను మోసుకెళ్లడానికి శ్రీహరికోటలోని మొదటి ప్రయోగ వేదికపై పిఎస్ఎల్వి-సి60 రాకెట్ సిద్ధంగా ఉంది. ఇందుకు సంబంధించి షార్లో ఆదివారం రాత్రి 8.58 గంటలకు కౌంట్ డౌన్ ప్రారంభించనున్నారు. 25 గంటల వ్యవధిలో కౌంట్ డౌన్ ప్రక్రియను పూర్తి చేసి ఈ కీలక రాకెట్ను నింగిలోకి పంపించడానికి శాస్త్రవేత్తలు తుది ఏర్పాట్లలో నిమగ్నమయ్యారు. ఇప్పటికే లాంచ్ రిహార్సల్స్ ను విజయవంతంగా పూర్తి చేసుకున్న అనంతరం శనివారం మిషన్ రెడీనెస్ రివ్యూ, లాంచ్ ఆథరైజేషన్ బోర్డు సమావేశాలు నిర్వహించారు.