ఇట్లు సెల్ఫోన్

ప్రియమైన వినియోగదారులకు, సెల్ ఫోన్ అయినా, మొబైల్ ఫోన్ అయినా గుప్పెట్లో ఇమిడిపోయే ఫోన్ అయినా నేను రాస్తున్న ఈ నాలుగు మాటలు శ్రద్ధగా చదవండి. ఇదేదో భయపెట్టడం అనుకుంటారు....కానే కాదు. జాగ్రత్తగా చదివితే నా మాటలు ఎంత ఉపయోగపడతాయో మీకే తెలుస్తుంది.

- - యామిజాల జగదీశ్

ప్రియమైన వినియోగదారులకు, సెల్ ఫోన్ అయినా, మొబైల్ ఫోన్ అయినా గుప్పెట్లో ఇమిడిపోయే ఫోన్ అయినా నేను రాస్తున్న ఈ నాలుగు మాటలు శ్రద్ధగా చదవండి. ఇదేదో భయపెట్టడం అనుకుంటారు....కానే కాదు. జాగ్రత్తగా చదివితే నా మాటలు ఎంత ఉపయోగపడతాయో మీకే తెలుస్తుంది.

ఈ అబద్ధం కన్నారా... విన్నారా...ఇతరులతో మాట్లాడటానికి నన్ను ఉపయోగించే మీతో నేను తెలియజేయాలనుకున్నది చెప్పకుండా ఉత్తరం రాస్తున్నాను.

కారణం.. మాటల కన్నా రాత గట్టిగా మనసు తెరపై నమోదవుతుంది. ఆధునిక యుగంలో ముఖ్యమైన పరికరాల తయారీలో నాకంటూ ఓ ప్రముఖ స్థానం ఉందన్నది మీ అందరికీ తెలిసిందే. నేను ఓ విధంగా మీకు వరాన్నే.

ఈరోజు మనిషి ఆక్సిజన్ లేకున్నా.బతికేస్తాడేమో కానీ నేను లేకుంటే బతకలేని స్థితి అనుకోండి. ఇది మీ అందరికీ తెలిసిందే.

ప్రపంచంలో చైనా తర్వాత నన్ను ఎక్కువగా ఉపయోగించేది భారతదేశమేనట..ట..

చైనాలోనూ, భారతదేశంలోనూ కోట్లాది మంది నన్ను ఉపయోగిస్తున్నారు. నేను లేకుంటే మీకు తోచదు. అది నిజం కదూ. ఒకప్పుడు చైనాలో సెల్ఫోన్లు ఉపయోగించినవారి సంఖ్య అరవై అయిదు కోట్లు. ఇక భారతదేశంలో పది కోట్ల మంది నన్ను ఉపయోగించారు. ఇప్పుడీ సంఖ్య మరింత పెరిగే ఉంటుంది కానీ తగ్గదు. మున్ముందు మరింత పెరుగుతుంది.అందులో ఆశ్చర్యమేమీ లేదు.

ఒకానొకప్పుడు వేరే ఊళ్లో ఉన్న ఒకరితో మాట్లాడాలంటే ట్రంక్ కాల్ బుక్ చేయాలి. అవతలి వ్యక్తి లైన్లోకి వచ్చేవరకు నిరీక్షించాలి. ఒకటి రెండు గంటల తర్వాత మాట్లాడండి అని లైనిస్తాడు. తీరా మీరు ఎవరితో మాట్లాడాలనుకున్నారో ఆ మనిషి లేడండి అని సమాధానం వస్తే ఎంతలా నీరసించిపోతామో.