சட்டமன்ற செய்திகள்

நீட் தேர்வு : சட்டப்பேரவையில் காரசார விவாதம்

சென்னை, ஜன.12- நீட் தேர்வு தொடர்பாக சட்டப் பேரவையில் முதலமைச்சர், அமைச்சர்கள், எதிர்க் கட்சித் தலைவர் இடையே காரசார விவாதம் நடைபெற்றது.

சட்டப் பேரவையில் நேற்று (11.1.2023) ஆளுநர் உரைக்கு நன்றி தெரிவிக்கும் தீர்மானத்தின் மீது நடந்த விவாதம்:

கே.பி.முனுசாமி (அதிமுக): பழனிசாமி முதலமைச்சராக இருந்தபோது, நீட் தேர்வு காரணத்தால் அரசுப்பள்ளி மாணவர்கள் மருத்துவக் கல்லூரிகளுக்கு செல்ல முடியாது என்ற நிலையை உணர்ந்தவுடன், உள்ஒதுக்கீட்டாக 7.5 விழுக்காடு இடஒதுக்கீடு கொடுத்தார். தமிழ்நாடு முதன்மை மாநிலமாக விளங்குவதற்கு எம்ஜிஆர், ஜெயலலிதா, பழனிசாமிதான் முழு காரணம்.

அமைச்சர் பொன்முடி: கலைஞர் முதலமைச்சராக இருந்தபோது தமிழ் நாட்டில் நீட் தேர்வு நுழையவிடாமல் தடுத்தார். பொறியியல் கல்லூரிகளில் நுழைவுத் தேர்வே வரக்கூடாது என்று சட்டம் போட்டார். 2009இல் தாழ்த்தப்படவர்களுக்கு இடஒதுக்கீட்டை 2 விழுக்காடு அதிகரித்தார்.