மூடநம்பிக்கையைப் போக்குவதற்கு கடவுள் - ஆத்மா போன்றவற்றை மறுத்து பெரிய புரட்சி செய்த முதல் பகுத்தறிவுவாதி புத்தர்!

மற்றவர்கள் செய்யத் தவறிய ஒன்றை, திராவிடர் வரலாற்று ஆய்வு மய்யம் இன்றைக்குச் செய்திருக்கிறது

திராவிடர் வரலாற்று ஆய்வு மய்யம் சார்பில் ஒரு நாள் தேசிய கருத்தரங்கத்தைத் தொடங்கி வைத்து தமிழர் தலைவர் ஆசிரியர் விளக்கவுரை

வேதங்களை மறுப்பதற்கு, ஜாதியை மறுப்பதற்கு, பெண்ணடிமையை நீக்குவதற்கு, மூடநம்பிக் கையைப் போக்குவதற்கு கடவுள், ஆத்மா போன்ற கருத்துகளையெல்லாம் மறுத்து பெரிய புரட்சி செய்த முதல் பகுத்தறிவுவாதி புத்தர். அந்த புத்தரையே என்ன செய்தார்கள் என்றால், மகாவிஷ்ணு அவதாரமாக்கி விட்டார்கள் என்றார் திராவிடர் கழகத் தலைவர் தமிழர் தலைவர் ஆசிரியர் கி.வீரமணி அவர்கள்.

கடந்த 4.8.2023 காலை சென்னை பெரியார் திடலில் உள்ள நடிகவேள் எம்.ஆர்.இராதா மன்றத்தில், திராவிடர் வரலாற்று ஆய்வு மய்யம் சார்பில், ‘‘இந்திய வரலாற்றின் மீதான திரிபுவாதத் தாக்குதல்’’ என்ற தலைப்பில் நடைபெற்ற ஒரு நாள் கருத்தரங்கத்தைத் தொடங்கி வைத்து திராவிடர் கழகத் தலைவர் தமிழர் தலைவர் ஆசிரியர் கி.வீரமணி அவர்கள் உரையாற்றினார்.

அவரது தொடக்கவுரையின் நேற்றையத் தொடர்ச்சி  வருமாறு:

தேசிய கீதத்தில், ‘திராவிட உத்கல வங்கா’ என்றுதானே பாடுகிறார்கள்

ஒவ்வொரு நாளும் அரசு நிகழ்வு மற்றும் தனியார் நிகழ்ச்சிகள் முடிகின்றபொழுது, எழுந்து நின்று, நம்முடைய நாட்டு வணக்கம் பாடுகிறார்கள்.   நாட்டு வணக்கம் என்று சொன்னால்கூட பல பேருக்குப் புரியாது. தேசிய கீதம் பாடுகிறார்கள். அந்த தேசிய கீதத்தில், ‘திராவிட உத்கல வங்கா' என்று உள்ளதையும்தானே பாடுகிறார்கள்.

ஆகவே, திராவிடம் என்கிற ஒரே ஒரு சொல்லுக்காக சொல்கிறேன் நண்பர்களே. எப்படியெல்லாம் திரிபு வாதம் செய்கிறார்கள் என்று பாருங்கள். பெரிய நிலை யில் இருக்கிறவர்கள் திரும்பத் திரும்பச் சொல்லும் பொழுது என்னாகும்?

பொய்யுடை ஒருவன் சொல்வன் மையினால் மெய் போலும்மே மெய்போலும்மே!

என்று சொல்வதைப்போல, மீண்டும் மீண்டும் ஒரே பொய்யைத் திரும்பத் திரும்ப சொன்னால் அது மெய்போல வரும் என்று சொல்லக்கூடிய அளவிற்குத் தான் செய்துகொண்டிருக்கிறார்கள்.