ദീപങ്ങൾ സാക്ഷിയാകുന്ന ആരാധനാ സമ്പ്രദായം

ദീപാരാധന എന്നാൽ ദീപങ്ങൾ കൊണ്ടുളള ആരാധനയാണ്. പൂജാ വേളയിലെ ഒരു വിശേഷപ്പെട്ട ചടങ്ങാണ് ദീപാരാധന. താന്ത്രികമായും, മാന്ത്രികമായും വൈദിക കർമ്മങ്ങളിലൂടെ സകല ചൈതന്യവും ഭഗവദ് പാദത്തിലേക്ക് അർപ്പിക്കുകയാണ് ദീപാരാധനയുടെ മുഖ്യ ലക്ഷ്യം. ദീപാരാധന എന്നതുകൊണ്ട് സാധാരണ അർത്ഥമാക്കുന്നത് സന്ധ്യാവേളയിൽ നടത്തുന്ന ദീപാരാധനയാണ്.

- ബാബുരാജ് പൊറത്തിശ്ശേരി 9846025010

ദീപാരാധനയ്ക്ക് സാധാരണയായി തട്ടുവിളക്ക്, പർവ്വതവിളക്ക് നാഗപത്തിവിളക്ക്, ഏകാങ്ക വിളക്ക് എന്നിങ്ങനെ വിവിധ വിളക്കുകൾ ഉപയോഗിച്ച് ഭഗവാനെ ഉഴിയുന്നു. അവസാനം കർപ്പൂരദീപം കാട്ടി പൂവുഴിഞ്ഞ് ദേവപാദത്തിൽ സമർപ്പിക്കുന്നു. ഈ ചടങ്ങാണ് ദീപാരാധന.

ദീപാരാധനതന്നെ പലവിധത്തിലുണ്ട്. അലങ്കാര ദീപാരാധന, പന്തീരടി ദീപാരാധന, ഉച്ചപൂജ ദീപാരാധന, സന്ധ്യാ ദീപാരാധന, അത്താഴ പൂജാ ദീപാരാധന എന്നിങ്ങനെ ദീപാരാധനയ്ക്ക് വിവിധതരത്തിൽ പേരുകൾ നൽകിയിരിക്കുന്നു.

ക്ഷേത്രങ്ങളിൽ ദീപാരാധനാവേളയിൽ ആരതി ഉഴിയുന്നത് എന്തിനെന്ന് നോക്കാം. ആ സമയം ദേവതാവിഗ്രഹം കൂടുതൽ പ്രകാശിതമായി ഭക്തർക്കു മുന്നിൽ തെളിയും. ആരതി ഉഴിയുന്ന വേളയിൽ നാമജപ മുഖരിതമാകും ക്ഷേത്രാങ്കണം. ദീപാരാധനാ സമയത്ത് ഉയരുന്ന മണിനാദവും മന്ത്രോച്ചാരണവും എല്ലാം ചേരുമ്പോൾ ഭക്തന് അവാച്യമായ അനുഭവമാണ് ഉളവാകുന്നത്. ഭഗവദ് വിഗ്രഹത്തിനു മുന്നിൽ ആരതി ഉഴിയുന്നതിനു പിന്നിൽ വലിയൊരുതത്വം ഒളിഞ്ഞിരിപ്പുണ്ട്.