ദാനങ്ങളിൽ വെച്ച് ഏറ്റവും മഹത്തായത് അന്നദാനം

അന്നദാനത്തിലൂടെ ദാനം ഏറ്റുവാങ്ങുന്നയാളിന് പരി പൂർണ്ണ തൃപ്തിയാണ് ഉണ്ടാകുന്നത്. ഈ ഒരു തൃപ്തി മറ്റൊരു ദാനത്തിലൂടെയും ആർജ്ജിക്കാൻ കഴിയില്ല.

- ബാബുരാജ് പൊറത്തിശ്ശേരി (9846025010)

ക്ഷേത്രങ്ങളിൽ ഇന്ന് മാസത്തിലൊരിക്കലെങ്കിലും അന്നദാനമില്ലാത്ത ക്ഷേത്രങ്ങൾ കുറവാണ്. ചിലയിടത്ത് ചില പ്രത്യേക നാളുകളിലും മറ്റുചില ആദ്യവ്യാഴം, ആദ്യവെള്ളി എന്നിങ്ങനെയുള്ള ദിവസങ്ങളിലുമാകും. ചിലപ്പോൾ ദേവന്റെ നാളിലോ പ്രതിഷ്ഠാനാളിലോ ആവാം. ഗുരുവായൂർ ക്ഷേത്രത്തിൽ ദിവസവും അന്നദാനമുണ്ടെങ്കിലും വർഷത്തിലൊരിക്കൽ പുന്നെല്ലരി കുത്തി നിവേദിക്കുന്ന പുത്തരി സദ്യയ്ക്ക് പ്രത്യേകതയുണ്ട്. അന്നദാനപ്രഭുവായ വൈക്കത്തപ്പന്റെ ക്ഷേത്രത്തിലും നിത്യവും അന്നദാനമുണ്ട്.

കൂടൽമാണിക്യം ക്ഷേത്രത്തിൽ തുലാമാസത്തിലെ തിരുവോണ നാളിലെ തൃപ്പുത്തരി സദ്യ ബഹു വിശേഷമാണ്. തൃപ്പുത്തരി സദ്യയുണ്ട് ഭഗവാന് വയറ്റിൽ അസുഖം പിടിപ്പെടുകയും, കുട്ടഞ്ചേരി മൂസ്സ് പ്രത്യേക ഔഷധക്കൂട്ടുകളുപയോഗിച്ച് തൈരിൽ കലക്കി തിളപ്പിച്ച് നിവേദിക്കുന്ന “മുക്കുടി അവിട്ടം നാളിലെ പ്രത്യേകതയാണ്. നാടിന്റെ നാനാഭാഗത്തുനിന്നും നിരവധി പേരാണ് മുക്കുടി പ്രസാദം വാങ്ങുവാനെത്തുക.

ദാനങ്ങളിൽ വച്ച് ഏറ്റവും മഹത്തായത് അന്നദാനമാണ്. മറ്റ് ഏതൊരു ദാനവും അന്നദാനത്തോളം മാഹാത്മ്യമേറിയതാവില്ല. വിശന്നു വലഞ്ഞുവരുന്ന ഒരാൾക്ക് അന്നം ലഭിക്കുമ്പോഴുണ്ടാകുന്ന ആശ്വാസവും അതുകഴിച്ചശേഷമുണ്ടാകുന്ന സംതൃപ്തിയും അന്നദാതാവിന് അനുഗ്രഹമായി പരിണമിക്കുന്നു.