ജന്മാന്തര ദുരിതങ്ങളകറ്റുന്ന ശ്രീരാമസ്വാമി

മുപ്പത്തിമുക്കോടി ദേവീദേവന്മാർക്കായി ആയിരക്കണക്കിന് ക്ഷേത്രങ്ങൾ കേരളത്തിൽ തന്നെയുണ്ടെങ്കിലും ശ്രീരാമക്ഷേത്രങ്ങൾ പൊതുവേ കുറവായിട്ടാണ് കാണുന്നത്. ഉളളവയാകട്ടെ പലവിധ കാരണങ്ങളാൽ പ്രശസ്തവും. അക്കൂട്ടത്തിൽ വലിപ്പം കൊണ്ടും പ്രതിഷ്ഠാഭാവത്തിന്റെ പ്രത്യേകതകൊണ്ടും ഏറെ പ്രശസ്തമാണ് തൃശൂർ നഗരത്തിൽ നിന്നും 22 കി. മീറ്റർ കിഴക്ക് നാട്ടിക പഞ്ചായത്തിലെ തൃപ്രയാറിലുളള തൃപ്രയാർ ശ്രീരാമക്ഷേത്രം. ശ്രീപ്രിയ പുണ്യനദി എന്നറിയപ്പെടുന്ന കനോലിക്കനാലിന്റെ തീരത്ത് കനാലിനഭിമുഖമായി സ്ഥിതിചെയ്യുന്ന ഈ ശ്രീരാമക്ഷേത്രത്തിന് അയ്യായിരം വർഷത്തെ പഴക്കമുണ്ടെന്നാണ് ആർക്കിയോളജി വകുപ്പിലെ രേഖകൾ തന്നെ പറയുന്നത്.

- പി.ജയചന്ദ്രൻ

ഭഗവാൻ ശ്രീകൃഷ്ണന്റെ സ്വർഗ്ഗാരോഹണത്തോടെ ദ്വാരക പ്രളയത്തിൽ മുങ്ങിയപ്പോൾ, ദ്വാരകയിൽ ഭഗവാൻ പൂജിച്ചുകൊണ്ടിരുന്ന വിഗ്രഹങ്ങൾ പ്രളയജലത്തിൽ ഒഴുകിപ്പോയി എന്നും അവയിലൊന്നാണ് തൃപ്രയാർ ശ്രീരാമസ്വാമിയുടെ വിഗ്രഹമെന്നുമാണ് വിശ്വാസം. ദശരഥപുത്രന്മാരായ ലക്ഷ്മണന്റേയും ഭരതന്റേയും ശത്രുഘ്നന്റേയും വിഗ്രഹങ്ങൾ പ്രളയത്തിൽ ഒഴുകിപ്പോവുകയും പിന്നീട് കണ്ടെടുത്ത് പ്രതിഷ്ഠിക്കുകയും ചെയ്തിട്ടുണ്ടെങ്കിലും പ്രശസ്തിയും പ്രധാന്യവും കൂടുതൽ ശ്രീരാമദേവനാണ്. ഭരതൻ പ്രതിഷ്ഠയായിട്ടുളള കൂടൽമാണിക്യവും, ലക്ഷ്മണൻ പ്രതിഷ്ഠയായുളള മൂഴിക്കുളം, ശത്രുഘ്നൻ പ്രതിഷ്ഠയായിട്ടുളള പായമ്മൽ എന്നിവയാണ് മറ്റ് മൂന്ന് ക്ഷേത്രങ്ങൾ. കഴിഞ്ഞ കാൽനൂറ്റാണ്ടുകാലമായി സഹോദരന്മാരായ ഈ നാലുപേരേയും ഒരേദിവസം ദർശിച്ച് പൂജ നടത്തുന്നത് പുണ്യമാണെന്ന വിശ്വാസത്താൽ കർക്കിടകമാസത്തിൽ നാലമ്പലദർശനം എന്ന ഒരു ചടങ്ങ് നടന്നുവരുന്നുണ്ട്. തൃപ്രയാറിൽ തുടങ്ങി ഉച്ച പൂജയ്ക്കു മുൻപു ഈ നാലു ക്ഷേത്രങ്ങളിലും ദർശനം നടത്തുന്നത് വലിയ പുണ്യമാണ്.

ശ്രീരാമന്റെ ചക്രവർത്തി രൂപത്തിലുളള പ്രതിഷ്ഠയാണ് തൃപ്രയാറിലേത്. ഭഗവാന്റെ അങ്ങനെയൊരു ഭാവത്തിലുളള പ്രതിഷ്ഠ വേറെയില്ല എന്നാണ് മേൽശാന്തി കാവനാടുമന രവി നമ്പൂതിരി പറയുന്നത്. ഖരവധം കഴിഞ്ഞുളള സങ്കൽപ്പമായതിനാൽ തൃപ്രയാർ തേവർക്ക് രൗദ്രത അൽപ്പം കൂടുതലാണെന്നും മേൽശാന്തി പറയുന്നു. ശ്രീരാമന്റെ പ്രതിഷ്ഠയാണെങ്കിലും തീമൂർത്തികളായ ബ്രഹ്മാവിന്റെയും വിഷ്ണുവിന്റെയും മഹേശ്വരന്റെയും ശക്തിയും ചൈതന്യവുമുണ്ട് തേവർക്ക്. അത്രയ്ക്ക് പവർഫുൾ ആണ് തൃപ്രയാർ തേവർ.