വക്രയുഗത്തിന്റെ ഉള്ളറകൾ

യുഗങ്ങൾ പലതുണ്ട്. ഇത് കലിയുഗം. കലിയുഗത്തിൽ യുഗങ്ങളെ അപേക്ഷിച്ച് പലതും സംഭവിക്കാം.

- ശങ്കരാടിൽ മുരളി 9074507663

അത്തരത്തിലൊരു പ്രതിഭാസമാണ് "വക്രയുഗം.' രാശി ചക്രം വളഞ്ഞിരിക്കുന്നതിനാലാണ് വക്രയുഗം സംഭവിക്കുന്നതെന്ന് ദോഷദൃക്കുകളും ഗുണദൃഷ്ടിയുള്ളവരും യുക്തിവാദികളും സമ്മതിക്കുന്നുണ്ട്.

മര്യാദയ്ക്ക് കുംഭം രാശിയിൽ സ്വന്തം വീട്ടിൽ സുഖകരമായി കഴിഞ്ഞിരുന്ന ശനീശ്വരനെ ഈ രോഗം ആരോപിച്ച് രണ്ട് മൂന്നു മാസം മുമ്പ് യൂട്യൂബ് ജ്യോതിഷികൾ വെന്റിലേറ്ററിലാക്കി. അവരുടെ ഗണിതപ്രകാരം ശനീശ്വരൻ വക്രരോഗം ബാധിച്ച് കിടപ്പാണ്.

കേളികേട്ട പഞ്ചാംഗങ്ങളോ, ഈ രംഗത്തെ അതിപ്രഗത്ഭരായ ജ്യോതിഷ ഭിഷഗ്വരന്മാരോ ഇക്കാര്യം അറിഞ്ഞില്ല. കോവിഡ് പോലെ, 2018 ലെ മനുഷ്യനിർമ്മിത വെള്ളപ്പൊക്കം പോലെ ജനം പരിഭ്രാന്തരായി. ചിലർക്ക് കണ്ടകശനി വന്നു. മറ്റുചിലർക്ക് ഏഴരശനി വന്നു. വേറൊരു വിഭാഗം ഇത്തരം പ്രശ്നങ്ങളിൽ നിന്നും ഫ്രീയായി. ഫോണിലൂടെ ആ നാളുകളിൽ ഒരേ ഒരു ചോദ്യം മാത്രം. എന്താണ് വക്രം, അതിന്റെ സത്യാവസ്ഥയെന്താണ്?