മാളികപ്പുറത്തമ്മ

പാപവിമുക്തമായ ദേവീചൈതന്യം

- പി. ജയചന്ദ്രൻ

നമ്മുടെ എല്ലാ ആരാധനാ സങ്കൽപ്പങ്ങളിലും വച്ച് ഏറ്റവും പ്രാധാന്യമേറിയതും ഗൗരവമേറിയതുമാണ് ദേവീ പൂജ. ആ ദേവിയുടെ ശക്തി പ്രകടമാകുന്ന അത്ഭുത പുണ്യസങ്കേതമാണ് ശബരിമലയിലെ മാളികപ്പുറം ക്ഷേത്രം. മാളികപ്പുറത്തമ്മ എന്ന പേരിലാണ് ഇവിടത്തെ ദേവിയെ അറിയപ്പെടുന്നത്. ശബരിമല ക്ഷേത്ര സമുച്ചയത്തിലെ മണിമണ്ഡപത്തിന് മുന്നിലുള്ള മാളികപ്പുറത്തമ്മയെ ദർശിച്ച് വഴിപാടുകൾ നടത്തുക എന്നുള്ളത് ശബരിമല ദർശനത്തിലെ ഒരു പ്രധാന കാര്യമാണ്. പന്തളം രാജകുടുംബം തങ്ങളുടെ കുലദൈവമായി ആരാധിക്കുന്ന ദേവീചൈതന്യം മാളികപ്പുറത്തമ്മ എന്ന പേരിൽ അറിയപ്പെടാൻ കാരണമായി വിശ്വസിച്ചുപോരുന്ന ഒരു കഥയുണ്ട്. പണ്ട് പന്തളം രാജകുടുംബം ശബരിമല സന്ദർശിക്കുമ്പോൾ മണിമണ്ഡപത്തിന് പിറകിലുള്ള മാളികയിലാണ്(ചെറിയ കൊട്ടാരം) താമസിച്ചിരുന്നത്.

അങ്ങനെ താമസിച്ചിരുന്ന നാളുകളിലൊരിക്കൽ കുലദേവതയായ ദേവിവിഗ്രഹത്തെ ഇവിടെ പ്രതിഷ്ഠിച്ചു എന്നും, ആ നിലയിൽ മാളികക്കൊട്ടാരത്തിൽ പ്രതിഷ്ഠിച്ച ദേവിയാണ് പിൽക്കാലത്ത് മാളികപ്പുറത്തമ്മ എന്ന പേരിൽ അറിയപ്പെടാൻ തുടങ്ങിയതെന്നുമാണ് വിശ്വാസം. മധുര മീനാക്ഷി ദേവിയുടെ ഭാവമായാണ് മാളികപ്പുറത്തമ്മയെ കണക്കാക്കുന്നത്.

എന്നാൽ അയ്യപ്പനെ കളരിപ്പയറ്റ് പഠിപ്പിച്ച ചീരപ്പൻചിറ പണിക്കരുടെ മകളാണ് മാളികപ്പുറ അമ്മ എന്നും വിശ്വസിച്ചുപോരുന്നു

ആലപ്പുഴ ജില്ലയിൽപ്പെട്ട മുഹമ്മയിലെ, കളരിക്ക് പേരുകേട്ട ഒരു പുരാതന കുലീന ഈഴവ കുടുംബമാണ് ചീരപ്പൻ ചിറ, കളരിപ്പയറ്റ് പഠിക്കാൻ അയ്യപ്പൻ ഇവിടെ വന്നിരുന്നു എന്നാണ് ഐതിഹ്യം. ചിരപ്പൻചിറ പണിക്കർക്ക് സ്വന്തം നാട്ടിനുപുറത്തുള്ള ഒരാളെ പരിശീലിപ്പിക്കാൻ താൽപ്പര്യക്കുറവുണ്ടായിരുന്നതിനാൽ, പന്തളത്തെ രാജകുമാരൻ എന്ന യഥാർത്ഥ സത്യം മറച്ചുവച്ചു കൊണ്ടാണ് അയ്യപ്പൻ പിരപ്പൻചിറ കളരിയിൽ പ്രവേശനം നേടിയൽ. ആ ചീരപ്പൻ ചിറപ്പണിക്കരുടെ മകളാണ് മാളികപ്പുറത്തമ്മ.