കർണ്ണന്റെ ജഡം കൈവെള്ളയിൽ വാങ്ങിയ മോക്ഷദായക മഹാവിഷ്ണു

നൂറുകണക്കിന് സ്ത്രീ ഭക്തജനങ്ങൾ നടത്തുന്ന നാരങ്ങാവിളക്ക് വഴിപാട് അച്ചട്ടായ ഫലസിദ്ധി നൽകുന്നു എന്നാണ് അനുഭവസാക്ഷ്യം.

- പി. ജയചന്ദ്രൻ

കേരളസ്രഷ്ടാവായ പരശുരാമൻ പ്രതിഷ്ഠാകർമ്മം നടത്തിയ 108 മഹാവിഷ്ണു ക്ഷേത്രങ്ങളിൽ ഒന്നായി കരുതപ്പെടുന്ന അതിപുരാതനമായ ഒരു ക്ഷേത്രമാണ് തിരുമുല്ലവാരം ശ്രീമഹാ വിഷ്ണു ക്ഷേത്രം. കൊല്ലം റെയിൽവേ സ്റ്റേഷനിൽ നിന്ന് 6 ഉം, കെ.എസ്.ആർ.ടി.സി ഡിപ്പോയിൽ നിന്ന് 4 ഉം കിലോമീറ്ററുകൾ പടിഞ്ഞാറ് മാറി അറബിക്കടലിന്റെ തീരത്ത് സ്ഥിതി ചെയ്യുന്ന ഈ ക്ഷേത്രം, പിതൃതർപ്പണബലി മോക്ഷ കർമ്മാദികളുമായി ബന്ധപ്പെട്ട് ഏറെ പ്രശസ്തമാണ്. പ്രസ്തുത കർമ്മങ്ങൾക്ക് ഏറ്റവും പുണ്യമായി കരുതപ്പെട്ടുപോരുന്ന കേരളത്തിലെ നാല് കേന്ദ്രങ്ങളിൽ ഒന്നാണ് തിരുമുല്ലവാരം. തിരുവല്ലം, തിരുനാവായ, തിരുനെല്ലി എന്നിവയാണ് മറ്റ് മൂന്ന് പുണ്യസ്ഥലങ്ങളായി പറയപ്പെടുന്നത്. എന്നാൽ പ്രത്യേക ഭാവചൈതന്യത്തോടെ മഹാവിഷ്ണു ഭഗവാൻ മോക്ഷദായകനായി കുടികൊള്ളുന്ന ക്ഷേത്രത്തിന്റെ സാന്നിധ്യവും ശാന്തസുന്ദരമായ കടലിന്റെ സാമീപ്യവും തിരുമുല്ലവാരത്തെ കൂട്ട ത്തിൽ വേറിട്ടുനിർത്തുന്നു എന്നുള്ളതാണ് വാസ്തവം. കാരണം ബലി അവശിഷ്ടവും മറ്റും ഒഴുക്കിക്കളയണം എന്നാണ് വിശ്വാസം. ശാന്തസുന്ദരമെങ്കിലും സദാതീരത്തണയുന്ന ചെറുതിരകൾ ആ അവശിഷ്ടങ്ങളെ കടലിനുള്ളിലേയ്ക്ക് ഒഴുക്കിക്കൊണ്ടുപോകുന്നു. അതുകൊണ്ടുതന്നെ പിതൃ മോക്ഷകർമ്മങ്ങൾ ചെയ്യുന്നതിനായി ദിവസവും നൂറുകണക്കിന് ഭക്തരാണ് തിരുമുല്ലവാരം സമുദ്ര സ്നാനഘട്ടത്തിൽ വന്നുചേരുന്നത്. കടലിലെ വെ ള്ളത്തിൽ മുങ്ങി, ഈറനോടെ ബലിപ്പന്തലിലെത്തി, ആചാര്യന്മാർ ഉരുവിടുന്ന മോക്ഷമന്ത്രം ഭക്ത്യാദരപൂർവ്വം ഏറ്റുചൊല്ലി കർമ്മങ്ങൾ ചെയ്ത്, ബലി അവശിഷ്ടങ്ങൾ കടലിലൊഴുക്കി സമുദ്ര സ്നാനം നടത്തി, ക്ഷേത്രത്തിലെത്തി മോക്ഷദായകനായ ഭഗവാനെ വണങ്ങി, പരേതാത്മാക്കളുടെ പേരും നാളും പറഞ്ഞ് തിലഹോമം നടത്തുന്ന തോടെ പിതൃപുണ്യം ലഭിക്കുന്നു എന്നാണ് വിശ്വാസം.

ക്ഷേത്രപുരാണം