മഹാദേവൻ കണ്ട കുമാരനല്ലൂർ തൃക്കാർത്തിക

ക്ഷേത്രമാഹാത്മ്യം...

-  ഡോ.ശ്രീകാന്ത്

പുനരെഴുത്തുകൾക്കും പുനർവായനകൾക്കും വിധേയമാകുന്നവയാണ് ചരിത്രം. സാമൂഹിക ഇന്നലെകളുടെ ഈടു വയ്പുകളെ കഥകളിലൂടെയും മിത്തിലൂടെയും നിർമ്മിച്ചെടുക്കുന്ന വ്യാഖ്യാനങ്ങൾക്ക് തരംഗ സ്വഭാവമാണുള്ളത്. നൂറ്റാണ്ടുകളായി നില നിന്നുപോന്ന വാമൊഴി വഴക്കങ്ങളെ വെറും കെട്ടുകഥകളായി മാത്രം കാണാനാവില്ല. എഴുതപ്പെട്ട ചരിത്രത്തോളം പ്രാധാന്യം അവയ്ക്കുണ്ട്. ആ ചരിത്രത്തോട് ചേർന്നു നിൽക്കുന്ന നിരവധി അടയാളങ്ങളും ഇത്തരം കഥകളിൽ കാണാനാകും. അങ്ങനെയാണ് ഐതിഹ്യങ്ങൾ അനുഭവതലത്തിലെത്തുന്നത്. ദേശം,കല, സംസ്കാരം എന്നിവയിലൂടെ ഐതിഹ്യങ്ങൾ അർത്ഥവത്താകുന്ന കേരളീയ പശ്ചാത്തലത്തിലാണ് ക്ഷേത്രങ്ങളുടെ ചരിത്രം പ്രാധാന്യമർഹിക്കുന്നത്.

കോട്ടയം ജില്ലയിലെ കുമാരനല്ലൂർ ദേവീക്ഷേത്രം പഴക്കം കൊണ്ടും ഐതീഹ്യം കൊണ്ടും സവിശേഷമായ പ്രാധാന്യമുള്ളതാണ്. ക്ഷേത്രത്തിന്റെ പേരിൽ അറിയപ്പെടുന്ന ഗ്രാമവും ഗ്രാമ ക്ഷേത്രമായ കാർത്യായനി ക്ഷേത്രവും നിരവധി ചരിത്രമൂഹൂർത്തങ്ങൾക്ക് സാക്ഷിയായതുമാണ്. ചരിത്രവും ഐതീഹ്യവും ഇഴ ചേർന്ന സാമൂഹിക സംസ്കാരമാണ് കുമാരനല്ലൂരിന്റെത്. ചരിത്ര ശകലങ്ങളിലും ശിലാരേഖകളിലും കുമാരനല്ലൂർ ദേവീക്ഷേത്രത്തിന് ആയിരത്തിലധികം വർഷത്തെ പഴക്കമുണ്ട്. ചേരമാൻ പെരുമാളിന്റെ ഭരണകാലത്ത് സുബ്രഹ്മണ്യനെ പ്രതിഷ്ഠിക്കാനായി നിർമ്മിച്ച ക്ഷേത്രത്തിൽ മധുരയിൽ നിന്നു വന്നു കുടി കൊണ്ട് കാർത്യായനി ദേവിയുടെയും ദേവിയുടെ പൂജാരിയുടെയും കഥ ഏറെ പ്രസിദ്ധമാണ്.

മധുരമീനാക്ഷിയുടെ സാന്നിദ്ധ്യം