നാഞ്ചിനാട്ടിലെ യക്ഷിയും ദൈവങ്ങളും

തമിഴ്നാടിനോട് ചേർന്നുകിടക്കുമ്പോഴും മലയാളികൾ നെഞ്ചോടുചേർക്കുന്ന നാട്, നാഞ്ചിനാട്. ഐതിഹ്യങ്ങളും വിശ്വാസങ്ങളും പുരാവൃത്തങ്ങളും ഈ മണ്ണിൽ പുണർന്നു കിടക്കുന്നു. കുമാരകോവിലും യക്ഷി അമ്മയും ഉദയഗിരിക്കോട്ടയും അതിരിടുന്ന ആ നാട്ടുകാഴ്ചകളിലൂടെ ഒരു പകലിൽ

- TEXT: P.V. SURAJ

"ജ്ഞാനവും പഴവും നീതന്നെയല്ലേ മുരുകാ, പിന്നെന്തിനാണ് അതുതേടി അലഞ്ഞത്', ശ്രീമുരുകനോട് മഹാകവയി അവ്വയാർ പാടിച്ചോദിക്കുകയാണ്. ലോകത്തെ വലംവയ്ക്കാൻ പുറപ്പെട്ടതാണ് മുരുകൻ. എങ്കിൽ മാത്രമേ അച്ഛന്റെ കൈയിൽനിന്ന് ജ്ഞാനപ്പഴം ലഭിക്കൂ. എന്നാൽ സഹോദരനായ ഗണപതി ലോകം ചുറ്റാനൊന്നും നിന്നില്ല, പരമശിവനെയും ശ്രീപാർവതിയെയും മൂന്നുവട്ടം വലം വെച്ചു. അതായിരുന്നു ഗണപതിയുടെ ലോകം. അങ്ങനെ ജ്ഞാനപ്പഴം സ്വന്തമാക്കി. തിരിച്ചുവന്നപ്പോൾ മുരുകൻ പരിഭവിച്ചു. കൈലാസം വിട്ടിറങ്ങി ഒരു മലയിൽ താമസമാക്കി. പരമശിവനും പാർവതിയും മകന്റെ അടുത്തെത്തി, ജ്ഞാനപ്പഴം നീ തന്നെ എന്നുപറഞ്ഞ് അവനെ ശാന്തനാക്കി. പഴം നീ അങ്ങനെ പഴനിയായി, മുരുകന്റെ പഴനിമലയായി.

തിരുവനന്തപുരത്തു നിന്ന് തക്കലയിലേക്ക് പോകവേ പണ്ടെങ്ങോ കേട്ട കഥ വീണ്ടും ഓർമയിലെത്തി. ഈ യാത്ര  മുരുകനെ കാണാൻ വേണ്ടിയാണ്. അത് പക്ഷേ പഴനിയിലേക്കല്ല, വേളി മലയിലേക്കാണ്. നാഞ്ചി നാടിന്റെ ജീവൻ തുടിപ്പായ വേളിമലയുടെ താഴ്വാരത്തിലാണ് കുമാരകോവിൽ. സുബ്രഹ്മണ്യനും വള്ളീദേവിയും അവിടെയാണ് വാണരുളുന്നത്.

നെയ്യാറ്റിൻകര പിന്നിട്ട് കളിയിക്കാവിളയിലേക്ക് പ്രവേശിച്ചു. തമിഴ് മണ്ണിന്റെ മണം. കന്യാകുമാരിയും തോവാളയും അഗസ്തീശ്വരവും ഉൾപ്പെടുന്ന നാഞ്ചിനാട് മലയാളികൾക്ക് സ്വന്തം നാടുപോലെയാണ്. പഴയ തിരുവിതാംകൂറിന്റെ തെക്കേത്തല. സ്വാതന്ത്ര്യം കിട്ടുന്നതുവരെ അങ്ങിനെതന്നെ ആയിരുന്നു. പിന്നീട് ഭാഷാ അടിസ്ഥാനത്തിൽ സംസ്ഥാനങ്ങൾ നിലവിൽ വന്നപ്പോഴാണ് തമിഴ്നാട്ടിലേക്ക് പോയത്.

"കുൻഡിരിക്കും (കുന്നിരിക്കും) ഇടമെല്ലാം കുമരനുക്ക്' എന്നൊരു ചൊല്ലുണ്ട് തമിഴിൽ. എവിടെയെല്ലാം കുന്നുണ്ടോ അവിടെയെല്ലാം മുരുക ക്ഷേത്രം കാണുമെന്നാണ് മലയാളത്തിൽ അർഥം. സുബ്രഹ്മണ്യന്റെ പ്രധാന ക്ഷേത്രങ്ങളാണ് ആറുപടെ വീടുകൾ. കുംഭകോണം, പഴനി, തിരുച്ചെന്തൂർ, തിരുപ്പറംകുൻഡ്രം, തിരുത്തണി, പഴമുതിർച്ചോലൈ എന്നിവയാണ് അവ. അതിൽ നിന്നെല്ലാം വ്യത്യസ്തമാണ് വേളിമലയിലെ കുമാരകോവിൽ, മുരുകൻ വള്ളിയെ വിവാഹം ചെയ്തത് ഇവിടെയാണ്.

പ്രശസ്ത സംവിധാ യകൻ മെരിലാൻഡ് സുബ്രഹ്മണ്യത്തിന്റെ കൺകണ്ട ദൈവമായിരുന്നു കുമാരകോവിൽ മുരുകൻ. മെരിലാൻഡ് സിനിമകളിലെ ലോഗോയിൽ കാണുന്നത് ഇവിടുത്തെ മുരുകനാണ്.