മരുഭൂവിലെ പാമ്പും പറവയും

A desert safari that reveals the vividness,vitality and biodiversity of the Arabian desert and wafts to memory Walt Disney's incomparable LIVING DESERT.

- TEXT & PHOTOS KAUSHIK VIJAYAN.

നോക്കെത്താ ദൂരത്തോളം പരന്നു കിടക്കുന്ന മരുഭൂമി, കാറ്റ് സമ്മോഹനമായ അലങ്കാരപ്പണികൾ ചെയ്ത മണൽപ്പരപ്പ്... കഠിന താപത്തെ അതിജീവിച്ച് മണൽപ്പരപ്പിലെ നിമ്നോന്നതപാതയിലൂടെ, ഓളപ്പാളികളിൽ ചാഞ്ചാടുന്ന ഒരു യാനപാത്രത്തിലെന്ന പോലെയായിരുന്നു സഞ്ചാരം. പഴയൊരു 2003 മോഡൽ കാറായിരുന്നു മരുഭൂവിലൂടെ പത്തുദിവസം നീളുന്ന യാത്രയ്ക്കായി തിരഞ്ഞെടുത്തത്. അബഹയിലെത്തി പക്ഷികളുടെ ചിത്രങ്ങൾ പകർത്തുകയായിരുന്നു ലക്ഷ്യം.

മാർച്ചിലെ ആദ്യവാരത്തിലാണ് താമസസ്ഥലമായ സൗദിയിലെ ദമാമിൽ നിന്ന് പുറപ്പെട്ടത്. എഴുപത് പിന്നിട്ട പക്ഷിനിരീക്ഷകനായ ഫോട്ടോഗ്രാഫർ അഹമ്മദ് നിയാസി, പറഞ്ഞപ്രകാരം അബഹയിൽ കാത്തു നിൽപ്പുണ്ടായിരുന്നു. പക്ഷികളുടെയും ചിലയിനം പറവകളുടെയും ചിത്രങ്ങൾ പകർത്തി ആ ദിനം ഞങ്ങൾ അബഹയിൽ കഴിഞ്ഞു. മരുഭൂമിയിൽ മാത്രം കാണപ്പെടുന്ന പാമ്പുകളെ പകർത്തണമെന്ന ആഗ്രഹമറിയിച്ചപ്പോൾ അദ്ദേഹം എനിക്ക് മറ്റൊരു സൗദി വംശജനെ പരിചയപ്പെടുത്തിത്തന്നു. പിറ്റേദിവസം അബഹയിലെ മരുഭൂമിയിൽ അലഞ്ഞെങ്കിലും ചെറു പാമ്പുകളെയും ഉരഗങ്ങളെയും മാത്രമാണ് കാണാനായത്. വടക്കൻ ആഫ്രിക്കൻ മരുഭൂമിയിലും അറേബ്യൻ മരുഭൂമിയിലും കണ്ടുവരുന്ന കൊമ്പുള്ള അണലിയെ (Desert Horned Viper) കണ്ടെത്തുകയായിരുന്നു ലക്ഷ്യം. ജിസാനിലേക്ക് പോയാൽ ഇത്തരം പാമ്പുകളെ കാണാൻ കഴിഞ്ഞേക്കുമെന്ന് പുതുതായി കൂടെ കൂടിയ സുഹൃത്ത് എന്നോട് പറഞ്ഞു.