സ്വർണം വിളയുന്ന പാടങ്ങളിലൂടെ

സാമ്പവർവടകര, സുന്ദരപാണ്ഡ്യപുരം, ശങ്കരൻകോവിൽ... മലയാളിക്ക് ഓണം കൂടാൻ പൂക്കളും പച്ചക്കറികളും വിളയുന്ന തമിഴ്നാടൻ ഗ്രാമങ്ങളിലൂടെ...

-  J.R. ANI

സമയം രാവിലെ എട്ടിനോടടുക്കുന്നു. മഴ ചന്നം പിന്നം പെയ്തുകൊണ്ടിരിക്കുകയാണ്. ഉടനെയൊന്നും നിൽക്കുന്ന ലക്ഷണം കാണാതിരുന്നപ്പോൾ ഒരുവേള യാത്രയ്ക്കായി തിരഞ്ഞെടുത്ത ദിവസം തെറ്റിപ്പോയോയെന്നും സംശയിച്ചു. ആര്യങ്കാവ് ചുരമിറങ്ങി എസ് വളവും കഴിഞ്ഞ് പുളിയറത്തിയാൽപ്പിന്നെ മഴയില്ല എന്നറിയാമായിരുന്നു. ആ ധൈര്യത്തിൽ പുറപ്പെടാൻ തന്നെ തീരുമാനിച്ചു. പൂക്കളുടെയും പച്ചക്കറികളുടെയും ആ പറുദീസയെക്കുറിച്ച് അത്രയേറെ കേട്ടിരിക്കുന്നു. സൂര്യകാന്തി പൂക്കൾക്കും ജമന്തിപ്പൂക്കൾക്കും പച്ചക്കറികൾക്കും പേരുകേട്ട തെകാശിയിലെ സാമ്പവർ വടകര, ശങ്കരൻകോവിൽ, സുന്ദരപാണ്ഡ്യപുരം എന്നിവിടങ്ങളിലേക്കായിരുന്നു യാത്ര.

കോട്ടവാസലും കടന്ന് താഴേയ്ക്കിറങ്ങിയപ്പോൾ ചുറ്റിനും നിറയുന്ന ഗിരിശൃംഗങ്ങൾ. ഒരർഥത്തിൽ അതുതന്നെയാണ് കേരളത്തിന്റെ അനുഗ്രഹവും. മഴമേഘങ്ങളെ അതിർത്തി കടക്കാതെ തടഞ്ഞുനിർത്തുകയാണവർ. ഇടവപ്പാതി തമിഴ്നാട്ടിൽ കാര്യമായി ലഭിക്കുക പതിവില്ല. ഒക്ടോബർ-നവംബർ മാസങ്ങളിലെ തുലാവർഷമാണ് അവിടങ്ങളിൽ പെയ്യാറ്. എങ്കിലും ശോഷിച്ച ജല സ്രോതസ്സുകൾ വെച്ചും മണ്ണിൽ പവിഴം വിളയിക്കുന്നവരാണ് ഇവിടത്തെ കർഷകർ.

റോഡിന് ഇരുവശങ്ങളിലും പൂത്തുലഞ്ഞു നിൽക്കുന്ന തേക്കുമരത്തോട്ടങ്ങളാണ് ആദ്യം കാണാനാകുക. കേരളത്തിലേതു പോലെ തലയെടുപ്പുള്ള വൻവൃക്ഷങ്ങളല്ല ഇവിടെയുള്ളത്. നിരന്തരം വീശുന്ന കാറ്റിനെത്തുടർന്ന് അവയധികം ഉയരംവെക്കാറില്ല. തെന്മലയും ചെങ്കോട്ടയും താണ്ടി വാഹനം കൊറണ്ട റൂട്ടിലേക്ക് കടന്നു. ഇലത്തൂർ, ആയ്ക്കടി, പിന്നെ കമ്പിളിയും പിന്നിട്ട് ഏഴുകിലോമീറ്ററോളം പോയാൽ സാമ്പവർവടകരയായി.