കാനനവാസന്റെ പൊന്നമ്പലമേട്ടിൽ

കാനനവാസന്റെ തിരുസന്നിധിയെ പുൽകുന്ന വനസഞ്ചയത്തിലൂടെയുള്ള യാത്ര. ഔദ്യോഗിക ആവശ്യത്തിനായി ഒരുപതിറ്റാണ്ട് മുൻപ് പൊന്നമ്പലമേട്ടിലേക്ക് നടത്തിയ യാത്ര ഓർത്തെടുക്കുകയാണ് ഈ ഫോറസ്റ്റ് ഉദ്യോഗസ്ഥൻ

- TEXT& PHOTOS J RANI

വീണ്ടുമൊരു മണ്ഡലകാലം ആഗതമായിരിക്കുന്നു. കൊടും ഭീതി വിതച്ച മഹാമാരിയുടെ കറുത്തദിനങ്ങൾക്ക് തത്കാലത്തേക്കെങ്കിലും വിട. കാനനവാസനെന്നും ഹരിഹരസുതനെന്നും സർവാഭീഷ്ട പ്രദായകനെന്നും പുകൾപെറ്റ ശബരിഗിരീശനെ തൃക്കൺ പാർക്കാൻ ദേശങ്ങൾ താണ്ടി ഭക്തർ പമ്പയിലേക്ക് ഒഴുകിയെത്തുകയാണ്.

വനംവകുപ്പ് ഉദ്യോഗസ്ഥന്റെ ഔദ്യോഗികപരിവേഷങ്ങളോടെ ഒരു ദശാബ്ദത്തിനും മുൻപ് നടത്തിയ യാത്ര, ഇന്നും മനസ്സിൽ മായാതെ കിടപ്പുണ്ട്. ഔദ്യോഗിക കൃത്യനിർവഹണത്തിന്റെ ഭാഗമായിട്ടായിരുന്നു പൊന്നമ്പല മേട്ടിലേക്കുള്ള ഈ യാത്ര.

മറ്റൊരു മണ്ഡലകാലത്തിന്റെ ആരംഭത്തിലായിരുന്നു യാത്രയ്ക്ക് തുടക്കം കുറിച്ചത്. പുലർച്ചെ ആറരയോടെ കൊച്ചുപമ്പയിലെ വൈദ്യുതി ബോർഡിന്റെ അതിഥി ബംഗ്ലാവിൽ ഉറക്കമുണരുമ്പോൾ വല്ലാത്ത ഒരുന്മേഷമായിരുന്നു. മണ്ഡലകാലം തുടങ്ങി ഒരുമാസം പിന്നിട്ടിരിക്കുന്നു. വേനൽ കനക്കുമ്പോഴും സൂര്യരശ്മികൾക്ക് തീക്ഷ്ണത കുറവ്. എന്നാൽ, ഇനിയുള്ള നാളുകളിൽ വനത്തിൽ തീപിടിത്തത്തിന് സാധ്യതകൾ ഏറെയാണ്.

യാത്രികർ കെടുത്താതെ വലിച്ചെറിയുന്ന സിഗരറ്റ് കുറ്റിയിൽ നിന്നോ തീപ്പെട്ടിക്കൊള്ളിയിൽ നിന്നോ പടരുന്ന ഒരുതരി കനൽ മതി ഈ അത്യപൂർവ കാനനം ഒന്നാകെ കത്തിയമരാൻ. വേനലിൽ ഉണങ്ങിയ പുൽ മേടുകളിൽ തീപിടിച്ചാൽ നിമിഷാർധത്തിൽ അത് നിയന്ത്രണങ്ങളുടെ ചരടുകളെല്ലാം പൊട്ടിച്ചെറിയുമെന്ന്  പറയേണ്ടതില്ലല്ലോ.

കാടറിഞ്ഞ് ഒരുയാത്ര

പൊന്നമ്പലമേട്ടിലേക്കുള്ള യാത്രയ്ക്കും തൊട്ടു മുൻപത്തെ വർഷമായിരുന്നു പുൽമേട് ദുരന്തം ഉണ്ടായത്. 2011 ജനുവരി 14-ന് ഉപ്പുപാറയിലെ പുൽമേട്ടിൽ മകരവിളക്കിനോടനുബന്ധിച്ച് ഉണ്ടായ തിക്കിലും തിരക്കിലുംപെട്ട് 104 മനുഷ്യജീവനുകളായിരുന്നു പൊലിഞ്ഞത്.

കൊച്ചുപമ്പയിലെ കെ.എ സ്.ഇ.ബി. കാന്റീനിൽ നിന്ന് ഇഡ്ഡലിയും സാമ്പാറും കഴിച്ച് വനംവകുപ്പിന്റെ ജീപ്പിലായിരുന്നു യാത്ര ആരംഭിച്ചത്. കൊച്ചുപമ്പ ചെക്ക് പോസ്റ്റ് പിന്നിട്ട് കാടിനുള്ളിലൂടെ നാല് കിലോമീറ്ററോളം നീളുന്ന ജിപ്പ് യാത്ര.