ചേകാടിയിലെ കാർഷികജീവിതങ്ങൾ

ആധുനികതയോട് സമരസപ്പെടാതെ ഗോത്രസംസ്കാരം നിലനിർത്തിപ്പോരുന്ന ഗ്രാമമാണ് വയനാട്ടിലെ ചേകാടി. നൂറ്റാണ്ടുകളായി ഇവിടത്തെ ആദിവാസിവിഭാഗങ്ങൾ നെൽക്കൃഷിയിറക്കുന്നു. നാലുഭാഗവും വനത്താൽ ചുറ്റപ്പെട്ടുകിടക്കുന്ന കാടിയുടെ ആത്മാവ് നെൽക്കൃഷിയിലാണ്

- Arun P Gopi

വയനാടിന്റെ ഭൂമികയിൽ നാല് സംസ്കാരങ്ങൾ അന്തർലീനമാണ്. വനസംസ്കാരം, ഗോത്രസംസ്കാരം, വയൽ സംസ്കാരം, പുഴസംസ്കാരം. ഈ നാല് സംസ്കാരങ്ങളുടെയും സംഗമ ഭൂമിയാണ് ചേകാടി. ഇപ്പോഴും നാഗരികതയ്ക്ക് വഴിമാറാത്ത വയനാട്ടിലെ കൊച്ചുഗ്രാമം. വയൽനാടാണ് വയ്യനാടായതെ ന്നും കാലാന്തരത്തിൽ അത് വയനാടായി മാറിയതെന്നും പറയപ്പെടുന്നു.

മഞ്ഞുമൂടിയ ഒരു പ്രഭാതത്തിൽ ബാവലിയിൽ നിന്ന് കബനീനദി കടന്നാണ് ചേകാടിയിലെത്തിയത്. മുൻപൊരു വർഷകാലത്തായിരുന്നു ഇവിടെയെത്തുന്നത്. അന്ന്, കാടിവയലിലെ കാവൽമാടത്തിലിരുന്ന് കണ്ണെത്താദൂരത്തോളം പച്ചപ്പിൽ വ്യാപിച്ചുകിടക്കുന്ന വയലേലകളെ നോക്കിനിന്നിട്ടുണ്ട്. ചേകാടിയിൽ ഇപ്പോൾ കൊയ്ത്തുകാലമാണ്. ചേകാടിയുടെ കാർഷികാത്മാവായ വയലുകളിലേക്ക് കുട്ടികൾ ഇറങ്ങിച്ചെല്ലുന്നു. കൊയ്ത്തു കഴിഞ്ഞ നെല്ലുകൾ കറ്റകളാക്കി മെതിക്കാനായി കൊണ്ടുപോകുന്നു. സായാഹ്നത്തിൽ പാടവരമ്പുകളിൽ പന്തുകളിച്ച് ഉല്ലസിക്കുന്നു. ഗ്രാമീണജീവിതത്തിൽ അന്യം നിന്നുപോകാത്ത കാഴ്ചകളായിരുന്നു അതൊക്കെയും.

ഭൂമിശാസ്ത്രവും കുടിയേറ്റവും

നാലുഭാഗവും വനത്താൽ ചുറ്റപ്പെട്ടുകിടക്കുന്ന കാർഷിക ഗ്രാമമാണിത്. ഒരതിരിലൂടെ വടക്കുപടിഞ്ഞാറായി ഒഴുകുന്ന കബനീനദി ഗ്രാമത്തെ ഫലഭൂയിഷ്ഠമാക്കുന്നു. ചേകാടിയേക്കാൾ വലിയ വയലുകൾ ഒരുപക്ഷേ, വയനാട്ടിൽ കണ്ടക്കാം. എന്നാൽ, ചേകാടിക്കു മാത്രം അവകാശപ്പെടാവുന്ന ഒരുകാര്യമുണ്ട്. ഇവിടെ വയൽ നികത്തൽ ഉണ്ടായിട്ടില്ലെന്നതാണത്. അതിനുകാരണമുണ്ട്. പുൽപ്പള്ളി പഞ്ചായത്തിൽ സ്ഥിതിചെയ്യുന്ന ചേകാടി, ഏറ്റവും കൂടുതൽ പട്ടികവർഗ വിഭാഗങ്ങൾ തിങ്ങിപ്പാർക്കുന്ന ഇടമാണ്. തൊണ്ണൂറ്റി യഞ്ചുശതമാനവും ഗോത്രവിഭാഗങ്ങളാണ് ഈ ഗ്രാമത്തിലുള്ളത്. കരഭൂമി കുറവും വയൽഭൂമി കൂടുതലുമുള്ള വയനാട്ടിലെ ഏക ഗ്രാമം. 75 ഏക്കർ കരഭൂമിയേ ചേകാടിയിലുള്ളൂ. നെൽകൃഷിയെ പൈതൃകമായിക്കാണുന്ന ഈ ഗോത്രവിഭാഗങ്ങൾ 170 ഏക്കർ വയൽ നികത്താതെ സംരക്ഷിച്ചുപോരുന്നുവെന്നത് അഭിമാനകരമാണ്.