പൊന്നാനിയുടെ ഇടവഴികളിലൂടെ

പട്ടണത്തിന്റെ മേലങ്കിയുണ്ടെങ്കിലും പൊന്നാനിയുടെ ഉള്ളിന്റെയുള്ളിൽ ഗ്രാമീണസംസ്കാരം ഇപ്പോഴുമുണ്ട്

ഗ്രാമച്ഛായയുളള പട്ടണം

ഗ്രാമത്തെ ഉള്ളിൽ സൂക്ഷിക്കുന്ന ചെറുപട്ടണമാണ് പൊന്നാനി, ധാരാളം കാഴ്ചകൾ ഇവിടെ കാണാം. അതൊരുപക്ഷേ, നീണ്ട ഇരുമ്പ് ഓടാമ്പലുകൾ വലിച്ചെടുത്ത്, നിരപ്പലകകൾ നീക്കിത്തുറക്കുന്ന ഓടിട്ട കടകളുടേതാവാം, ചാരുപടിയിൽ ചമംപടിഞ്ഞിരുന്ന് പെട്രോമാക്സ് നന്നാക്കുന്ന വൃദ്ധനായ മെക്കാനിക്കിന്റേതാവാം. അതുമല്ലെങ്കിൽ, കവലയിലെ ആൽമരത്തണലിലിരുന്ന് സൊ പറയുന്ന പല പ്രായത്തിലുള്ള ചങ്ങാതിക്കൂട്ടങ്ങളുടേതാവാം. രസകരമാണ് ഇന്നാടിന്റെ ചരിത്രം. യവനരും ചീനക്കാരും അറബികളും ഇവിടെ കച്ചവടത്തിനായി വന്നു. കൂട്ടത്തിൽ പ്രബലരായിരുന്ന അറബികളുമായുള്ള കച്ചവടം വിഭവങ്ങളുടെ വിപണനത്തിനു പുറമേ, സാംസ്കാരികവും മതപരവുമായ കൊടുക്കൽ വാങ്ങലുകളിലേക്കും നയിച്ചു. അറബികൾക്കു ശേഷം വന്ന യൂറോപ്യന്മാരും പൊന്നാനിയെ തുറമുഖപട്ടണമായാണ് ഉപയോഗിച്ചത്. ബ്രിട്ടീഷ് ഇന്ത്യയിലെ മലബാർ കളക്ടറായിരുന്ന എച്ച്.വി. കനോലി നിർമിച്ച കനോലി കനാൽ, പൊന്നാനിയിലൂടെ കടന്നു പോകുന്നു.