മുചുകുന്നിലെ മായക്കാഴ്ചകൾ

അഴകറ്റിനിൽക്കുന്ന അകലാപ്പുഴ, തൊട്ടടുത്തായി കണ്ടൽക്കാടും കോൾനിലങ്ങളും കന്യാവനങ്ങളും... കുട്ടനാടിനെ വെല്ലുന്ന കാഴ്ചകളൊരുക്കുകയാണ് മൂന്ന് കുന്നുകൾ ചേർന്ന മുചുകുന്ന്

- SHARMILA

തണുപ്പേറിയ മാസങ്ങളിൽ മുചുകുന്നും കുന്നിൻപുറത്തെ ഗ്രാമവും പുലരിമഞ്ഞിലൊളിക്കാറുണ്ട്. ചെറിയൊരു ഉത്തരേന്ത്യൻ കാലാവസ്ഥ! കൊയ്ത്തുകഴിഞ്ഞ പാടശേഖരമാണ് മുന്നിൽ, ഉണങ്ങിയ വൈക്കോൽമഞ്ഞയിൽ മേയുന്ന വെളുത്ത മഞ്ഞ്. മുകളിലേക്ക് പോവുന്തോറും തണുപ്പ് കൂടി. ഗ്രാമം തെളിഞ്ഞു. കൃഷിപ്പണിക്ക് പോവുന്നവർ, പാലുമായി സൈക്കിളിൽ പോകുന്നവർ, ഉറക്കച്ചടവോടെ പുസ്തകസഞ്ചിയും പേറി നടക്കുന്ന കുട്ടികൾ. മൂന്ന് കുന്നുകളുടെ (പുറമല, മോവില്ലൂർകുന്ന്, വലിയ മല) കൂട്ടം എന്ന അർഥത്തിലാണ് ഈ പ്രദേശത്തെ മുചുകുന്നെന്ന് വിളിക്കുന്നത്! കാഴ്ചകൾ മാറിമാറി വന്നു. പാട ത്തിന് നടുവിൽ മയങ്ങിക്കിടക്കുന്ന ജലാശയം. കൊയിലോത്തുംപടിയിലെ കടുക്കുഴിച്ചിറ. വയലിൽനിന്ന് പാത നിർമാണത്തിനാവശ്യമായ കളിമണ്ണ് വൻതോതിൽ കുഴിച്ചെടുത്തുണ്ടായതാണ് കടുക്കുഴിച്ചിറയെന്ന് പറയപ്പെടുന്നു. താമരപ്പൂക്കൾക്കിടയിൽ മുങ്ങാം കോഴികൾ കൊക്കുരുമ്മി. അവിടവിടെ തെറിച്ചുവീണ നക്ഷത്രങ്ങൾ പോലെ നെയ്യാമ്പലുകൾ. കാട്ടുതാറാവുകളുടെ (ചൂളൻ എരണ്ടകൾ) ഒരു കൂട്ടം പറന്നിറങ്ങുന്നു.

നീലജലപ്പരപ്പിനപ്പുറം ചുറ്റുപാടുകളിൽ ലയിച്ചു നിൽക്കുന്ന പോലെ കോവിലകം ക്ഷേത്രം, അൽപ്പമകലെ കുന്നിന്റെ ഉച്ചിയിലേക്കുള്ള കയറ്റത്തിൽ പ്രശസ്തമായ മുചുകുന്ന് കോട്ട ശിവക്ഷേത്രം. കോട്ടയിൽ പരമ ശിവനും കോവിലകം ക്ഷേത്രത്തിൽ ഭഗവതിയുമാണ് സങ്കല്പം. ഈ രണ്ട് ക്ഷേത്രങ്ങളുമൊന്നിച്ചാണ് മുചുകുന്നിന് ദൃശ്യഭംഗിയും ചരിത്രത്തിന്റെ ഈടും നൽകുന്നത്. “കുംഭം 25 തൊട്ട് മീനം ഒന്ന് വരെയാണ് കോട്ട-കോവിലകം ക്ഷേത്ര ആറാട്ട്, ഉത്സവകാലത്ത് ഇരുക്ഷേത്രങ്ങൾക്കുമിടയ്ക്കുള്ള പാത ആറാട്ടുവഴിയായി പൊലിമയേറ്റും''- ക്ഷേത്രത്തിന്റെ ഊരാളികുടും ബമായ മമ്മൂട്ടിൽ തറവാട്ടിലെ മധുവിന്റെ വാക്കുകളിൽ കോട്ടയിലുത്സവം ഒരിക്കൽക്കൂടി കൊടിയേറി.